Elordada qazaqstandyq kremnıı negizinde kún batareıalaryn shyǵaratyn bolashaq zaýyt irgetasyna kapsýla salyndy

ASTANA. 10 jeltoqsan. QazAqparat /Marlan Jıembaı/ - Búgin «Qazatomónerkásip» UAK» AQ basqarmasynyń tóraǵasy Vladımır Shkolnık pen Frantsııa Respýblıkasynyń Atom energetıkasy jáne balama energııa kózderi jónindegi komıssarıatynyń basshysy Bernard Bıgo qazaqstandyq kremnıı negizinde kún batareıalaryn shyǵaratyn bolashaq zaýyt irgetasyna kapsýla saldy.

Atalǵan joba qurylysy Elbasy N.Nazarbaevtyń 2010 jyldyń qazanynda Frantsııaǵa issapary aıasynda qol qoıylǵan Qazaqstan men Frantsııa arasyndaǵy ındýstrıaldy-ınnovatsııalyq áriptestik jónindegi strategııalyq kelisimshartqa sáıkes júzege asyrylyp otyrǵandyǵyn atap ótken V.Shkolnık: «Kelesi jyldyń sońynda bul zaýyt jumysyn bastaýy kerek. Bul alańda jańaratyn energııa kózderin zerdeleý boıynsha birlesken ǵylymı-zertteý halyqaralyq ortalyǵy qurylady. Onyń jumysyna Qazaqstan ǵalymdary, Nazarbaev Ýnıversıtetiniń jastary men ǵalymdary, sonymen qatar «Qazatomónerkásip» kompanııasynyń qyzmetkerleri tartylady», - dedi.

Joba operatory - «Qazatomónerkásip» UAK» AQ-nyń enshiles kásiporny «Astana Solar» JShS-i. Zaýyt qurylysy aıaqtalǵannan keıin Astana Solar kún batareıalaryn shyǵarýdy qolǵa alady. Kásiporyn shyǵarǵan fotoelektrıkalyq plastınkalardyń jobalyq qýaty 60 Mvt, bolashaqta bul kórsetkishti 100 Mvt-qa deıin arttyrý kózdelgen. Qurylys jumystary kelesi jyldyń jeltoqsan aıynda tolyǵymen aıaqtalyp, zaýyt 2013 jyldyń 1 toqsanynda óndiristik qýatyna shyǵady dep josparlanǵan. Jobanyń jalpy quny shamamen 34 mlrd. teńgeni quraıdy.