Elordada Qazaqstan Respýblıkasynyń Ata Zańyna - 20 jyl» qujattyq kórmesi ótip jatyr

ASTANA. QazAqparat - QR Konstıtýtsııasynyń 20 jyldyǵyna oraı «Qazaqstan Respýblıkasynyń Ulttyq muraǵaty» RMM men «Nur Otan» partııasy Astana qalasy Esil aýdandyq fılıaly birlese otyryp «Qazaqstan Respýblıkasynyń Ata Zańyna - 20 jyl» atty qujattyq kórmesin ótkizdi.

Muraǵattyq qujattar men materıaldar kórmesiniń negizgi maqsaty - qoǵamnyń jáne memlekettiń Negizgi zańyn daıyndaý jáne qabyldaý tarıhyn qujattyq negizde kórsetý boldy, dep habarlaıdy nurotan.kz.

Kórmede Qazaqstan Respýblıkasy Ulttyq muraǵatynyń (Qazaqstan Respýblıkasynyń Konstıtýtsııasy), Qazaqstan Respýblıkasynyń Joǵarǵy Keńesiniń, Qazaqstan Respýblıkasynyń Ortalyq saılaý komıssııasynyń, Qazaqstan Respýblıkasy Úkimeti Apparatynyń, Qazaqstan Respýblıkasy Konstıtýtsııalyq Sotynyń qorlarynan qujattardyń túpnusqalary usynyldy.

Kórme qujattary Qazaqstan Respýblıkasy Konstıtýtsııasynyń jobasyn talqylaý men Qazaqstan Respýblıkasy Ortalyq saılaý komıssııasynyń 1995 jyldyń 30 tamyzynda ótken memleketimizdiń Negizgi zańyn qabyldaý jónindegi respýblıkalyq referendýmdy ótkizý jáne uıymdastyrýǵa, 1995 jyly Qazaqstan Respýblıkasynyń Konstıtýtsııasy qabyldanǵannan keıin shyqqan memlekettiń Negizgi zańyna engizilgen tolyqtyrýlar men ózgerister jónindegi zańdarǵa arnalǵan.

Kórmeniń ashylýyna Qazaqstan Respýblıkasynyń alǵashqy Konstıtýtsııasyn daıyndaý jónindegi jumys tobynyń músheleri, Qazaqstan Respýblıkasy Parlamentiniń depýtattary, Qazaqstan Respýblıkasy Mádenıet jáne sport mınıstrliginiń, respýblıkanyń etnomádenı birlestikteriniń ókilderi, tarıhshy-ǵalymdar, muraǵattanýshylar, qoǵam ókilderi jáne qala qonaqtary qatysty.

Kórmeni 2015 jyldyń qyrkúıek aıynyń sońyna deıin saǵ. 10.00-17.00 aralyǵynda barlyq azamattar tamashalaı alady. Kirý tegin.