Elordada Qazaqstan halqy Assambleıasynyń «Elbasy. Birlik. Kelisim» kórmesi ashyldy

NUR-SULTAN. QazAqparat – Búgin elordadaǵy Beıbitshilik jáne kelisim saraıynda Qazaqstan halqy Assambleıasynyń 25 jyldyǵyna arnalǵan «Elbasy. Birlik. Kelisim» kórmesiniń saltanatty ashylýy ótti, dep habarlaıdy QazAqparat QHA baspasóz qyzmetine silteme jasap.

Ekspozıtsııaǵa «Elbasy. Birlik pen Kelisim» úshtuǵyrlyqtyń ortaq ıdeologııalyq platformasymen biriktirilgen muraǵattyq materıaldar, fotosýretter, kitaptar men kádesyı-syılyqtary usynyldy.

Kórme elimizdiń basty merekesi – Táýelsizdik kúni qarsańynda ótýde.

Іs-sharaǵa QHA Tóraǵasynyń orynbasary – Hatshylyq meńgerýshisi J.Q. Túımebaev, QR Parlamentiniń Májilisi tóraǵasynyń orynbasary V.K.Bojko, QHA depýtattyq tobynyń jetekshisi S.A.Abdrahmanov, QHA depýtattyq tobynyń hatshysy N.V.Jumádildaeva, QR Parlamenti Májilisiniń depýtattary, Qazaqstandaǵy dıplomatııalyq korpýstyń ókilderi, Qazaqstan halqy Assambleıasynyń músheleri, ǵylym jáne mádenıet qaıratkerleri qatysty.

QHA Tóraǵasynyń orynbasary – Hatshylyq meńgerýshisi Janseıit Túımebaev kórmeniń maqsaty – Tuńǵysh Prezıdent – Elbasynyń Táýelsiz Qazaqstannyń qalyptasýy men damýyna qosqan úlesin jáne ondaǵy erekshe rólin kórsetý ekenin alǵa tartty.

«Táýelsizdiktiń alǵashqy kúnderinen bastap Ult Kóshbasshysy Qazaqstandy damytýdyń negizine etnostyq shyǵý tegine qaramastan teń quqyqtyq pen kelisimge negizdelgen búkil halyqtyń birligin jatqyzdy.

Osy jyldar boıy elimiz bul qaǵıdany berik ustanyp keledi.

Elbasynyń beıbitshilik pen kelisim saıasatynyń is júzinde júzege asyrylýy 1995 jyly ózi qurǵan Qazaqstan halqy Assambleıasynan kórinis tapty.

Qurylǵannan kúnnen bastap ol shoǵyrlandyrýdyń jáne biriktirýdiń biregeı ınstıtýtyna aınaldy. Zańdy túrde elimizdiń qoǵamdyq ómirinde sheshýshi pozıtsııaǵa ıe boldy.

Tuńǵysh Prezıdenttiń Assambleıa elimizdegi beıbitshilik pen kelisimniń shynaıy saqtaýshysyna aınalǵanyn beker atap ótken joq.

Búgin sizderdiń nazarlaryńyzǵa usynylyp otyrǵan ekspozıtsııa aǵymdaǵy qarapaıym oqıǵa emes.

Bul elimizdiń ortaq murasy. Beıbitshilik pen damý jolyndaǵy birliktiń úlgisi», - dedi ol.

Búginde beıbitshilik pen kelisimniń qazaqstandyq úlgisin halyqaralyq qaýymdastyq moıyndady.

Janseıit Túımebaevtyń aıtýynsha, buǵan qazaqstandyq dıplomat Qaırat Ábdirahmanov myrzanyń jaqynda EQYU-nyń az ulttar isteri jónindegi Joǵarǵy komıssary bolyp saılanýy jarqyn mysal bola alady.

«2002 jyly Bas hatshy Kofı Annan Qazaqstan basqa memleketterdiń aldynda turaqtylyq pen damýdyń úlgisi bola bilgenin aıtyp ótti.

Halyqaralyq uıymdar – BUU, EQYU, Eýropa Keńesi – bizdiń modeldiń qundylyǵyn moıyndap, onyń tıimdiligin joǵary baǵalady.

Bul kórme Sizderge jalpyulttyq birlik, kelisim men birtutastyq dáýirine aınalǵan táýelsiz Qazaqstannyń damý tarıhyn jaqsyraq bilýge jáne eń bastysy, ony túsinýge kómektesetinine senemin», - dep atap ótti QHA Tóraǵasynyń orynbasary.