Elordada qazaqsha onlaın kontent jasaýshylardyń forýmy ótkiziledi
QazForum – ınternettegi qazaqsha kontentti damytýǵa arnalǵan biregeı kásibı alań. AQSh-tyń Qazaqstandaǵy Elshiliginiń qoldaýymen jyl saıyn uıymdastyrylatyn qazaq tilin damytýdaǵy eń aýqymdy is-shara besinshi ret ótkiziledi. Forýmǵa Qazaqstannyń túkpir-túkpirinen 200-den astam kásibı maman qatysady. Qatysýshylar qatarynda medıa-sarapshylar, blogerler men jýrnalıster, BAQ bas redaktorlary men basshylary, digital sarapshylar men jańa kontent jasaýshylar bar.
Uıymdastyrýshylardyń aıtýynsha qazaqsha kontentke suranys artqan.
«Stýdentterdiń 63%-y qazaq tilinde oqıdy, BAQ-taǵy kontenttiń 72%-y qazaq tilinde beriledi. Halyqtyń 22% úsh tilde sóıleıdi. Qujat aınalymynyń 92%-y qazaq tilinde júrgiziledi. Atyraý, Mańǵystaý jáne Qyzylorda oblystary halqynyń 90%-dan astamyn qazaqtar quraıdy», delingen habarlamada.
Ár jyl saıyn 50-den astam jetekshi medıa-sarapshy, jýrnalıst pen qazaqsha onlaın kontent jasaýshy bir jerge jınalady.
«Sońǵy jyldary forýmǵa 700-den astam qatysýshy elimizdiń túrli óńirinen: Shymkent, Aqtóbe, Atyraý, Aqtaý, Taldyqorǵan jáne Kókshetaýdan qatysty. Kóptegen ózekti taqyryp talqylanyp, ótkir pikirtalastar ótkizildi. Forýmǵa qatysýshylardyń 71%-y QazForum-dy qazaqsha onlaın-kontent máseleleri boıynsha eń qyzyqty jáne qajetti alań retinde baǵalaıdy», delingen habarlamada.
4 jyl ishinde is-shara qazaqtildi onlaın medıa úshin jalpy respýblıkalyq dıalog alańyna aınaldy, onda qatysýshylar kásibı máselelerdi talqylap qana qoımaı, ózara tájirıbe almasady.
Bıyl jergilikti jáne sheteldik spıkerlerdiń qatysýymen qyzyqty sessııalar men sheberlik saǵatyn ótkizý josparlanǵan. Forým týraly aqparat áleýmettik jelide keńinen jarııalanady
Forým spıkerleri Qazaqstandaǵy BAQ-tyń damýyn talqylaý, maqsatty aýdıtorııamen jumys isteý jáne derekterdi taldaý, qazirgi medıadaǵy tendentsııany talqylaý, áleýmettik jelidegi kontent mazmunyn damytý jáne jarnamalaý, qazaqsha onlaın kontentti jasaýshynyń keısteri jáne tabysy; aqparat kózderi men big data-men jumys isteý, monetızatsııa jáne kreatıvti ekonomıka jaıy talqylanady.