Elordada «Qazaqsha bilesiń be? Dosyńa úıret!» atty jylda ótkiziletin baıqaý bastaldy
Baıqaýdyń ótkizilý tártibimen tanystyrý Memlekettik tildi damytý Prezıdenttik qorynyń dırektory Azat Sháýeev, «QAZTEST» Ulttyq testileý ortalyǵynyń basqarma bastyǵy Aıdos Ábdiqalyqov jáne Polıtehnıkalyq kolledjiniń tárbıe isi jónindegi orynbasary Záýresh Júsipovanyń qatysýymen ótti.
Baıqaýdyń basty maqsaty - stýdent jastardyń memlekettik tildi úırenýine yqpal etý jáne olardy yntalandyrý.
Baıqaýdyń ótý tártibimen tanysqan stýdentter arasynan dosyma qazaq tilin úıretemin jáne dosymnan úırenemin degen jastar juptary óz erikterimen qatysýǵa nıet bildirdi. Til úıretýshi, ıaǵnı qazaq tilin jetik meńgergen stýdent (oqytýshy) qazaq tilin bilýge yqylas tanytqan til úırenýshini (oqýshy), óz dosyn nemese kýrstasyn ortaǵa alyp shyqty.
Ári qaraı «QAZTEST» júıesi arqyly «oqýshylardyń» qazaq tilin meńgerý deńgeıi anyqtaldy. Olar til úırenýge berilgen eki aı ishinde aýyzeki qazaq tilin úırenip shyǵýy kerek. Al, eki aıdan soń «QAZTEST» júıesi jáne qazaq tilinde jeke áńgimelesý arqyly til úırenýshilerdiń qazaq tilin qandaı deńgeıde meńgergeni baǵalanyp, baıqaý jeńimpazdary anyqtalatyn bolady.
Júldeli oryndardy ıelengen jastar Qordyń arnaıy dıplomymen, baǵaly syılyqtarymen marapattalady.
Osyndaı baıqaý byltyr «Qazaqstan-Reseı» ýnıversıteti stýdentteriniń arasynda ótkizilgen bolatyn. Baıqaý talaby boıynsha berilgen eki aıdyń ishinde birneshe stýdent aýyzeki qazaq tilin meńgerip shyǵyp, olardyń úzdikteri - menedjment fakýltetiniń 2 kýrs stýdenti Krıstına Georbelıdze men aqparattaný fakýltetiniń 1 kýrs stýdenti Valerıı Ten Qordyń arnaıy dıplomymen jáne «altyn nómirli» uıaly telefondarmen marapattalǵan bolatyn.