Elordada qazaq memleketiniń qalyptasý tarıhy týraly qoljazbalar kórmege qoıyldy
Nur-Sultan qalasyndaǵy Qoljazbalar jáne sırek kitaptar ulttyq ortalyǵynda ashylǵan kórmege 100-den astam qoljazba qoıyldy. Kórme birneshe tarıhı kezeńdi qamtıdy. Atap aıtqanda, Túrki qaǵanaty, Qarahandar, Altyn Orda jáne Qazaq handyǵy zamany.
«Biz qazaq halqynyń memleket bolǵanyn kórsetkimiz keldi. Ol XV ǵasyrǵa sáıkes keledi. Óıtkeni, keıbir saıasatkerler bizde memleket bolǵan emes, qazaq halqy alǵash memleket bolyp Keńes Odaǵy kezinde 1936 jyly quryldy degendi alǵa tartady. Al XVІ ǵasyrdaǵy tarıhı derekterde qazaq, qazaq memleketi degen sóz kezdesedi. Qarasańyz, «qazaq memleketi» degen sóz jazylǵan. Bul «Mehman Nama Býhara» atty qoljazba», - dedi Qoljazbalar jáne sırek kitaptar ulttyq ortalyǵynyń bas sarapshysy Almat Ábsalyqov.
Onyń aıtýynsha, atalǵan ortalyqta tarıhı qoljazbalarmen qatar sırek kezdesetin kitaptar da saqtaýly.
«Qoljazbalardyń qatarynda «Tarıh-ı Rashıdı», «Mehman Nama Býhara», «Tarıh Djahon Ara» bar. Eń kóne qoljazba HІ ǵasyrǵa tıesili Júsip Balasaǵunnyń «Qutty bilik» qoljazbasy. Bizde onyń kóshirmesi saqtalǵan. Odan bólek, bizdiń ortalyqta Abaı Qunanbaev pen Ybyraı Altynsarınniń alǵashqy eńbekteri saqtalǵan», - deıdi ol.
Qoljazbalar kórmesi el Táýelsizdiginiń 30 jyldyq mereıtoıyna oraı uıymdastyrylyp otyr. Sharanyń ashylý saltanatyna elimizdegi Túrikmenstan, Ózbekstan jáne Túrkııa melmeketiniń elshileri qatysty.
Kórme jeltoqsan aıynyń sońyna deıin jalǵasady.