Elordada qazaq balasynyń ǵaryshty baǵyndyrǵanyna 30 jyl tolýyna oraı dóńgelek ústel ótti

NUR-SULTAN. QazAqparat – Elordadaǵy Ulttyq mýzeıde adamzattyń ǵaryshty alǵash ıgerýine 60 jyl jáne tuńǵysh qazaq ǵaryshkeriniń ǵaryshqa ushýyna 30 jyl tolýyna oraı Aeroǵarysh komıtetimen birlesken «Ǵarysh qaharmandary» atty dóńgelek ústel ótti, dep habarlaıdy QazAqparat tilshisi.

12 sáýirde adam balasynyń ǵaryshqa ushqanyna 60 jyl tolady. Al 2 qazanda Qazaqstannyń tuńǵysh ǵaryshkeri Toqtar Áýbákirovtiń 1991 jyly ǵaryshqa kóterilgenine 30 jyl bolmaq. Ulttyq mýzeı osy datalarǵa arnap taǵlymdyq shara ótkizdi. Naqtyraq aıtsaq, mektep oqýshylary «Ǵarysh sapary» ulttyqk kompanııasynyń mamandarymen dóńgelek ústel basynda pikir almasyp, ǵarysh álemi týraly kókeıdegi saýaldaryna jaýap aldy.

Nur-Sultan qalasyndaǵy №67 jáne №86 mektep-gımnazııanyń oqýshylary shara qonaqtarynyń qurmetine án oryndap, óleń oqydy.

Shara aıasynda «Ǵarysh ǵalamaty» atty derekti fılmnen úzindi kórsetilip, Ulttyq mýzeı qorynan kórme uıymdastyryldy. Onda fotosýretter, ǵaryshkerlerdiń taǵamy, zymyran maketteri, ár túrli ǵarysh kemeleriniń modelderi, V.Semenov pen R.Abdrazaqovtyń jeke kollektsııalarynan tuńǵysh ǵaryshker ıÝ.A Gagarınge baılanysty fotosýretter, konvertter men markalar, kádesyılar, jazba kitapshalary qoıyldy.

Shara barysynda «Qazaqstan Ǵarysh sapary» ulttyq kompanııasy basqarma tóraǵasynyń orynbasary Erǵazy Nurǵalıev sóz alyp, táýelsiz Qazaqstannyń ǵarysh júıesi qalaı qurylǵanyn, Baıqońyr ǵarysh aılaǵyn saqtap qalý jolyndaǵy sheshimtal qadamdar týraly keńinen kósilip áńgime órbitti.

«Ǵaryshqa alǵan adam ushqan kezde men birinshi synyp oqýshysy edim. Sol kúni muǵalim bárimizdi jınap alyp, ǵaryshqa alǵash ret adam ushqanyn, sonyń qurmetine úıge erte qaıtýýymyzǵa bolatynyn aıtqan. Meniń bala jadymda 12 sáýir osyndaı qýanyshpen este qalypty», - dep bastady áńgimesin.

Ǵarysh salasynyń ardageri Baıqońyrdy keńes odaǵy qulaǵannan keıin qańyratyp qaldyrmaı, búginge deıin saqtaý ońaı bolmaǵanyn eske aldy.

«Táýelsizdik jyldarynda Qazaqstannyń Tuńǵysh Prezıdenti Nursultan Nazarbaev Baıqońyrǵa jıi keletin. Toqtar Áýbákirovti de alǵash ǵaryshqa shyǵaryp salý úshin kelgeni esimde. Sodan 3-4 ótkende Reseı men Qazaqstan arasynda úlken halyqaralyq kelisim jasaldy. Sol kelisimniń arqasynda Baıqońyr ǵarysh kesheni búgingi qalpynda saqtalyp, dúnıejúziniń ǵarysh álemine qyzmet kórsetip tur. Búgin ǵana astana ýaqytymen 13.42-de ǵaryshqa «SoıýzMS-18» degen ǵarysh kemesi ushyp shyqty. Bortynda eki reseılik, bir amerıkalyq kosmanavt bar. Mine sol kezdegi qaýyrt eńbektiń arqasynda Baıqońyr ǵarysh salasyndaǵy óziniń ornyn áli saqtap tur», - dedi ulttyq kompanııa ókili.