Elordada qaıyrymdylyq týrnırinen túsken qarajat Arys turǵyndaryna aýdaryldy

NUR-SULTAN. QazAqparat - Nur-Sultan ákimdiginiń Tilderdi damytý jáne arhıv isi basqarmasy «Rýhanııat» kommýnaldyq memlekettik mekemesi buqaralyq sportty nasıhattaý maqsatynda qaıyrymdylyqqa baǵyttalǵan shaǵyn fýtboldan dástúrli qalalyq týrnır ótkizdi, dep habarlaıdy QazAqparat tilshisi.

Qala turǵyndaryn salaýatty ómir saltyn ustanýǵa ári qınalǵannyń muń-muqtajyn bólisýge shaqyrýdy maqsat etken týrnır №76 mektep-lıtseıiniń jasyl alańynda ótse, oǵan rýhanııat-qoǵam ókilderinen quralǵan 8 komanda qatysty.

«Qatysýshy komandalardyń jarnasy, oǵan qosa «El-Nesibe» qaıyrymdylyq qory men jekelegen azamattardyń kómegimen barlyǵy 154000 teńge jınalyp, Arys qalasynda turatyn eki otbasyǵa teńdeı bólip jiberildi. Buǵan deıin ótken týrnırlerden túsken qarajat elordalyq áleýmettik kómekke muqtaj otbasylarǵa tabystalǵan bolatyn. Bul joly barshamyzdy alańdatqan Arystaǵy jaǵdaıǵa baılanysty sol óńirdiń turǵyndaryna az da bolsa járdemimizdi tıgizsek degen nıetpen osylaı sheshtik. Atap aıtqanda, úıine snarıad túsip, baspanasy túgeldeı janyp ketken Qarlyǵash Baıegizova men ózi jáne eki ulyna snarıad tıip, aýyr jaraqattanǵan Nurlan Rahımovtyń otbasyna týrnırden túsken qarjyny aýdardyq. Qaıyrymdylyq týrnırine atsalysqan azamattarǵa alǵysymyz sheksiz», - deıdi uıymdastyrýshylardyń biri Qolǵanat Maqatuly.

Al týrnır qorytyndysyna kelsek, qarsylas shaq keltirmegen «Turan» komandasy «Rýhanııat» KMM aýyspaly kýbogyna ıe bolsa, olarǵa fınalda jol bergen «Sılıkatnyı» komandasy ekinshi oryndy mise tutty. Jartylaı fınalda súringen týrnır uıymdastyrýshylary «Rýhanııat» pen «Egemen Qazaqstan» komandalary ózara 3-oryndy sarapqa salyp, nátıjesinde «Egemen Qazaqstan» komandasy jeńiske jetti.