Elordada qaı jylǵy úıler súrilýi múmkin

NUR-SULTAN. QazAqparat – El astanasynda «Nurly jol» baǵdarlamasy boıynsha eskirgen úılerdi buzý jobasy iske asyrylyp jatyr. «QazAqparat» HAA ákimdikten bul jobaǵa qaı jyly salynǵan úıler kiretinin surap bildi.

Redaktsııanyń saýalyna jaýap bergen Nur-Sultan qalasynyń turǵyn úı jáne turǵyn úı ınspektsııasy basqarmasynyń mamandary súriletin úılerdiń kóbi keńes zamanynda boı kótergenin atap ótti.

«QR Úkimetiniń 2019 jylǵy 31 jeltoqsandaǵy №1054 qaýlysymen bekitilgen «Nurly jer» turǵyn úı-kommýnaldyq damytýdyń 2020-2025jyldarǵa arnalǵan memlekettik baǵdarlamasy sheńberinde elordada apattyq turǵyn úılerdi buzý jobasy iske asyrylýda. Negizgi qurylys konstrýktsııalary men ınjenerlik júıelerdiń tozý deńgeıi 61%-da asqan turǵyn úıler buzylýǵa jatady. Olardyń salynǵan jyly 1940 jyldan 1980 jylǵa deıin ózgerip otyrady», - delingen ákimdiktiń jaýabynda.

Ákimdik ókilderi súrilgen úı ornalasqan jer telimine qatysty da túsinik berdi.

«Qoldanystaǵy zańnamanyń talaptary boıynsha apattyq turǵyn úıdi buzý jáne odan azamattardy kóshirý turǵyn úıdi jáne úı ornalasqan jer ýchaskesin rekvızıtsııalaý tártibimen júrgiziledi», - deıdi turǵyn úı salasynyń mamandary.