Elordada qaı pánniń muǵalimderine tapshylyq bar

<p>ASTANA. KAZINFORM — Elordalyq bilim basqarmasynyń basshysy Qasymhan Senǵazyev Astanada qaı pán muǵalimderine qajettilik bar ekenin aıtyp berdi.</p>

«Qazirgi ýaqytta elordanyń bilim berý salasynda 21 myńnan astam pedagog jumys isteıdi. Onyń ishinde memlekettik jalpy bilim beretin mektepterde 12 myńnan astam pedagog bar. Ulttyq bilim berý derekteri bazasynyń málimetinshe, búgingi tańda pedagogtarǵa qajettilik — 91 adam. Qajettilik orys tilinde oqytatyn bastaýysh synyp muǵalimderi, matematıka, ınformatıka, tarıh, orys tili men ádebıeti, fızıka, hımııa muǵalimderine kóbirek baıqalady», — dedi Qasymhan Senǵazyev qalalyq máslıhat otyrysynda. 

Sonymen birge, arnaıy bilim berý uıymdaryndaǵy arnaıy pedagogterge, mektepke deıingi mekeme tárbıeshilerine qajettilik bar. 

2029 jylǵa deıin elordada 80 mektepti qoldanysqa berý josparlanǵan.

Onyń ishinde «Jaıly mektep» ulttyq jobasy aıasynda 24 mektep salynady. 

«Qalamyzda jyl saıynǵy bala ósimi 20 myńǵa jýyqtaıdy. Eger bizde 11-synypty 10-11 myń bala bitiretin bolsa, 1-synypqa 28-29 myń bala kelip jatyr. Boljam boıynsha 2027 jyly elorda oqýshylarynyń kontıngenti 330 myńnan, al pedagogterge qajettilik 3 myńnan asady», — dedi spıker. 

Oryn tapshylyǵy máselesin sheshý maqsatynda 2018 jyldan beri pedagogıkalyq mamandyqtarǵa Astana qalasy ákimdiginiń grantyn bóledi.