Elordada «Qaýipsiz qala» jobasy tanystyryldy

ASTANA. QazAqparat - Huawei kompanııasy búgin elordada aqparattyq qaýipsizdik pen jaılylyqty arttyrý salasyndaǵy birqatar ınnovatsııalyq sheshimdi tanystyrdy, dep habarlaıdy QazAqparat.

Megapolıs úshin barynsha qyzyqty árti ózekti jobalardyń biri «Qaýipsiz qala»  dep atalady. Huawei kompanııasynyń sarapshysy Sergeı Shatohınniń aıtýynsha, bul júıe birneshe komponentten turady.

«Atap aıtqanda, bul dıspetcherlerde bar symsyz jáne symdy baılanys quraly. Ol kartadan barlyq adamdardy, sholǵynshy kóligin jáne basqa nysandardy kórýge múmkindik beredi. Kez kelgen kameradan vıdeony esh kedergisiz alyp, ony termınaldary arqyly jibere de alady. Vıdeobaqylaý - bul júıeniń shaǵyn bólikteriniń biri ǵana. Máselen, qońyraý basqarý ortalyǵyna uıaly jeliden nemese basqa telefonnan tússe de operatordyń aldynda adamnyń qaı jerden habarlasyp turǵany kórinedi», - dedi ol.

Sarapshynyń atap ótýinshe, sol arqyly operator nysanaǵa jaqyn jerde qandaı kúshterdiń, quraldyń, qajetti sektorda qandaı baqylaý kamerasynyń bar  ekendigin bilip otyrady.

«Sodan keıin ol vıdeony sholǵynshyǵa jiberip, onyń termınalynda karta paıda bolady jáne qaı baǵytta júrý kerektigin birden túsinedi. Operator men sholǵynshy arasynda atalǵan júıe aıasynda daýys jáne vıdeo baılanysy bolady», - dedi Shatohın.

Osy rette ol atalǵan júıeniń quny qanshalyqty bolatyndyǵyn aıta almady. Degenmen, onyń Qytaıdyń, Saýd Arabııasy men Pákistannyń kóptegen qalalarynda jumys istep turǵandyǵyn atap ótti.