Elordada «Qasıetti qazaq eli» dástúrli halyqaralyq óner festıvali ótýde
Festıvaldiń ashylý sharasynda Dúnıejúzi qazaqtary qaýymdastyǵy tóraǵasynyń orynbasary Zaýytbek Turysbekov sóz sóılep, óner báıgesine qatysýshy shetelden kelgen qandastarymyzdy elorda kúnimen quttyqtady.
Sonymen qatar, Dúnıejúzi qazaqtary qaýymdastyǵy qolǵa alǵan jobalarmen tanystyrdy.
«Elbasynyń saıasatynyń arqasynda 27 jylda 1 mln qazaq elge oraldy. Búgingi kúni taǵy da 1 mln qandasymyz elge oralamyz dep nıettenip otyr. Biraq, biz olarǵa tısti jaǵdaı jasaýymyz kerek. Ár kelgen otbasyny jumys pen baspanamen qamtamasyz etýmiz qajet. Sonyń tóńireginde 2 jobany bastadyq. Bireýi Nur-Sultan qalasynyń janynda, ekinshisi Saryaǵash aýdanynda. Amandyq bolsa ol úlken bastama bolady. Ary qaraı kelgen azamattarǵa tıisti jaǵdaıdyń bárin jasaımyz dep josparlap otyrmyz», - dedi Zaýytbek Turysbekov.
«Otandastar» qorynyń vıtse-prezıdenti Maǵaýııa Sarbasovtyń atap ótýinshe, bul festıval Aqparat jáne qoǵamdyq damý mınıstrligi men Nur-Sultan qalasy ákimdiginiń qoldaýymen ótip jatyr.
«Qasıetti qazaq eli» atty dástúrli halyqaralyq óner festıvaline 10-nan astam elden 50-ge jýyq qandasymyz qatysýda. Qatysýshylardyń deni jastar. Sharanyń maqsaty ulttyq mádenıetimizdi, salt-dástúrimizdi dáripteý, taratý jáne eń bastysy talanatty jastardy anyqtap, naqty qoldaý kórsetý. Máselen, qoldaý sharalarynyń aıasynda elordadaǵy Qazaq ulttyq óner ýnıversıtetine osy festıvaldiń jeńimpazdaryn oqýǵa túsirý pysyqtalyp jatyr», - dedi ol.
Festıval múshaıra, terme, halyqtyq qoldanbaly óner, vokal (dástúrli án salý) atalymdary boıynsha ótedi. Oǵan Qytaı, Mońǵolııa, Reseı, Ózbekstan, Túrkııa, Iran, Ońtústik Koreıa, Shvetsııa sııaqty elderden ókilder kelgen.
Qandandastarymyzdyń ónerin Qalqaman Sarın, Dáýletkereı Kápuly, Aıgúl Qosanova syndy esimi elimizge belgili azamattar baǵalaıdy.