Elordada qart kisilerge Pfizer preparatymen revaktsınatsııa jasala bastady

NUR-SULTAN. QazAqparat - Nur-Sultanda 60 jastan asqan adamdar koronavırýsqa qarsy qaıta vaktsına retinde Pfizer-di ala alady. Sondaı-aq, bul vaktsına medıtsına qyzmetkerleriniń revaktsınatsııasy úshin de qoljetimdi, dep habarlaıdy QazAqparat elorda ákimdiginiń resmı saıtyna silteme jasap.

QR Bas memlekettik sanıtar dárigeriniń qaýlysyna sáıkes «Komırnatı» (Pfizer) vaktsınasyn qoldana otyryp, koronavırýstyń aýyr kórinisteriniń damý qaýpi joǵary medıtsına qyzmetkerlerin, 60 jáne odan joǵary jastaǵy adamdardy KVI-ǵa qarsy revaktsınatsııalaýǵa ruqsat etilgen.

Elordalyq emhanalarda azamattardyń osy sanatyn amerıkalyq ekpemen qaıta vaktsınatsııalaýǵa kiristi.

Alaıda, revaktsınatsııa vaktsınatsııaǵa qarsy kórsetilimderi joq adamdarǵa ǵana ruqsat etiledi.

Pfizer tek medıtsınalyq mekemelerde qoljetimdi, ony saýda ortalyqtaryndaǵy vaktsınatsııa pýnkterinen alý múmkin emes.

Esterińizge sala keteıik, qala boıynsha azamattardy vaktsınalaý jáne revaktsınalaý úshin 31 egý pýnkti ashyldy: 26-sy – medıtsınalyq uıymdarda, 4-eýi – saýda ortalyqtarynda jáne «Nurly jol» temirjol vokzalynda.

Búgingi kúni qala boıynsha 25 800-den astam adam qaıta vaktsınatsııalandy.

Elordada epıdemıologııalyq jaǵdaıdyń nasharlaýyna baılanysty dárigerler aýrýdyń aýyr aǵymyn nemese ólimdi boldyrmaý úshin azamattarǵa KVI-ge qarsy ekpeni múmkindiginshe tezirek alýǵa shaqyrady.