Elordada qardy ýaqytyly tazalamaǵan mekemelerge 4,3 mln teńge aıyppul salyndy
Nur-Sultan qalalyq ákimdiktiń baspasóz qyzmetiniń habarlaýynsha, osy ýaqytqa deıin «Magnum cash carry» JShS (Turan dańǵyly 55), «Qazaq tehnologııa jáne bıznes ýnıversıteti» AQ (Muhammedhanov kóshesi 37), «Astana gúlderi» JShS-ǵa («Mılana», Almaty k-si 9) qyzmet kórsetetin uıymdarǵa irgeles aýmaqty qar men muzdan ýaqtyly tazalamaǵany úshin aıyppul salynǵan. Aıyppul kólemi - 400 myń teńge.
«Sol sekildi «Mega Silk Way» SOO, «Saryarqa» SOO, «Astanalyq tsırk» MKPP, «Ailand» SOO, «Gastranmen» sýpermarketi (Túrkistan kóshesi) jáne taǵy basqa uıymdar eskertý aldy. Qys bastalǵaly qardy ýaqytynda tazalamaǵany úshin ákimshilik jaýapkershilikke 4,3 mln teńge somasyna 107 qyzmet kórsetetin uıym (PIK, ÓK, JShS, 2020 jyldyń qańtar aıynda 1,25 mln teńge somasyna 49 uıym), sondaı-aq 2,7 mln teńge somasyna 260 elordalyq shaǵyn jáne orta bıznes obektisi tartylǵan (2020 jyldyń qańtar aıynda 1,25 mln teńge somasyna 126 uıym).
«Sonymen qatar merdiger uıymdardyń qar tazalaý jumystary baqylaýǵa alyndy. Qys basynan beri «Qalalar men eldi mekenderdiń aýmaqtaryn abattandyrý erejelerin buzý...» QR ÁQBK 505-babyn buzǵany úshin barlyǵy 95 uıym ákimshilik jaýapkershilikke tartyldy. Aıyppul kólemi 5,7 mln teńge. Al 2020 jyldyń qańtar aıynda 38 uıym 2,5 mln teńge aıyppul tóledi. Ákimshilik jaýapkershilikten bólek, qala ákimdigi qar tazalaıtyn merdiger uıymdarǵa qatysty qosymsha sharalar qabyldap jatyr.
Atap aıtqanda, bir uıym memlekettik satyp alýdyń josyqsyz qatysýshy tizimine engizildi. 10 uıymmen qalany sanıtarlyq tazalaý boıynsha qyzmet kórsetý jónindegi kelisimshart buzylyp, basqa kompanııalarmen jańa kelisim shart jasaldy», - dep habarlaıdy ákimdikten.