Elordada karantın tártibin buzǵandarǵa 159 mln teńge aıyppul salyndy

NUR-SULTAN. QazAqparat - Elordanyń monıtorıng toptary karantın tártibin buzǵan kásipkerlik sýbektilerin anyqtaý táýlik boıy kúsheıtilgen rejımde júrgizilip jatyr, dep habarlaıdy QazAqparat qala ákimdigine silteme jasap.

Ákimdiktiń málimetinshe, ákimshilik jaýapkershilikke tartylatyny jónindegi kóptegen eskertýge jáne ótinishke qaramastan keıbir mekemeler jumys rejımin saqtaý jónindegi talaptardy áli kúnge deıin elemeı, buqaralyq is-sharalar ótkizedi, al qyzmetkerleri betperde taqpaıdy.

Máselen, 16 shildede elordada karantın shekteýin saqtamaǵan 8 kásipker nysany anyqtaldy.

Saryarqa aýdanynda belgilengen ýaqyttan keıin «Pei Zdes» laýndj-bary, «Atom» kompıýter klýby jáne «Ýgol 4/1» bary jumys istedi.

Almaty aýdanynda ornalasqan «Kısh Mısh» kafesinde, «Kakıe lıýdı» barynda, «Eho» klýbynda da jumys rejımin saqtamaǵanyn anyqtady.

Sonymen qatar, Esil aýdanyndaǵy «Inforno» meıramhanasy men «VZletnyı» resto-bary saǵat 22.00-den keıin kelýshilerdi kirgizgen. Al «VZletnyı» tipti qorqor usynǵan.

Tártip buzýshylarǵa qatysty jınalǵan materıaldar tıisti shara qabyldaý úshin aýdandyq sanıtarııa-epıdemıologııa baqylaý basqarmasyna tapsyryldy.

Aıta keteıik, jyl basynan 15 shildege deıin elordada shekteý jáne karantın sharalaryn buzǵany úshin 786 jeke jáne zańdy tulǵa jalpy somasy 159 mln teńgege ákimshilik jaýapkershilikke tartyldy.

Nur-Sultanda qalyptasqan epıdemıologııalyq ahýaldy, KVI-men aýyrǵandar sanynyń kún saıyn ósýin eskere otyryp, qala turǵyndary men qonaqtary, sondaı-aq kásipkerlik nysandary sanıtarlyq normalardy jáne karantın rejıminiń talaptaryn qatań saqtaý tıis. Adam kóp jınalatyn oryndarǵa barýdan, is-sharalar uıymdastyrýdan aýlaq bolyp, gıgıenanyń qarapaıym erejelerin saqtaý kerek.