Elordada iri kólemdegi esirtkimen er adam ustaldy

NUR-SULTAN. QazAqparat – Nur-Sultan qalasynyń polıtseıleri asa iri kólemde sıntetıkalyq esirtki jasyrmaq bolǵan er adamdy quryqtady, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.

Elordanyń patrýldik polıtsııa qyzmetkerleri kezekshilik kezinde Qaraǵandy tasjolynyń boıyndaǵy aǵashtardyń arasynan belgisiz er adamdy baıqaǵan.

«Kúdikti mańaıyn uıaly telefon kamerasyna túsirip júrgen. Polıtseıler ony toqtatyp, ormanda qandaı maqsatpen júrgenin suraǵanda, zırat basynan kele jatqanyn aıtqan. Biraq, er adamnyń qatty qobaljyp turǵany kúdik týdyrǵan. Teksere kele polıtsııa qyzmetkerleri aǵash túbinen muqııat qaptalǵan sıntetıkalyq esirtki taýyp aldy. Pakette «Mefedron» jáne «Alfa-RVR» sıntetıkalyq esirtkisiniń bary anyqtaldy. Alynǵan preparattyń jalpy salmaǵy 1,25 keliden asady», - delingen habarlamada.

Polıtsııanyń habarlaýynsha, esirtkini elordaǵa jetkizgen 27 jasar Almaty qalasynyń turǵyny bolyp shyqty.

«Kúdikti esirtkini Nur-Sultan qalasynyń aýmaǵynda satpaq bolǵan. Qazirgi ýaqytta sotqa deıingi tergep-tekserý júrip jatyr. 6 myńnan astam bir rettik dozanyń quny «qara» naryqta 25 mln teńgeni quraıdy. Jyl basynan beri elorda aýmaǵynda zańsyz aınalymnan 30 keliden astam sıntetıkalyq esirtki tárkilendi», - deıdi vedomstvodan.

Osy oraıda polıtsııa departamenti sıntetıkalyq esirtkiniń adam aǵzasyna tıgizetin jáne táýeldilikke ákeletin zııany týraly eskertedi.

«Preparat mı men julynnyń fýnktsııalaryna keri áser etip, qozǵalys protsesteri, este saqtaý, emotsııalardy qalyptastyrý sezimin buzady. Sondaı-aq, ımmýndyq jáne reprodýktıvti júıelerdiń jasýshalaryna teris yqpal etip, ıntellekt buzylady», - degen eskertý jasaldy.

«Esirtki qylmysymen kúreste esirtkini satý, jarnamalaý jáne elorda arqyly ótkizý faktilerin anyqtaýǵa basa nazar aýdarylýda. Biz 2022-2025 jyldarǵa arnalǵan «Nur-Sultan - esirtkisiz qala» jańa baǵdarlamasyn ázirledik, onda esirtkige qarsy is - qımyldy kúsheıtý boıynsha birqatar is-shara kózdelgen», - deıdi qalalyq polıtsııa departamentiniń basshysy, general-maıor Marat Tólebaev.

Osyǵan deıin Qazaqstanda 8 esirtki zerthanasy joıylǵanyn habarlaǵanbyz.