Elordada ınvestorlar esebinen birneshe balabaqsha salynady
«Bıyl kópqabatty turǵyn úıler keshenderiniń birinshi qabatynda ornalasqan balabaqshalar janynan qosymsha 500 oryn ashýdy josparlap otyrmyz. Sol sııaqty 25 mektepke deıingi uıymda 200 ınklıýzıvti oryn ashpaqpyz. Sonymen qatar, ınvestorlardyń esebinen 570 orynǵa 3 tıptik balabaqsha salý jospary bar», - dedi Qasymhan Senǵazyev elorda máslıhatynyń otyrysynda.
Bilim basqarmasy basshysynyń aıtýynsha, mektepke deıingi bilim berý uıymdarynyń baǵdarlamasyna ózgerister engizilip, tárbıe-bilim jospary ıkemdeledi.
«Balalardy túrli ádis-tásildermen tárbıeleýdiń kún tártibi ázirlendi. Onyń ishinde oıyn arqyly úıretý, pedagog pen balanyń ózara til tabysýy, shyǵarmashylyqqa baýlý sekildi ádister qoldanylady. Jekemenshik balabaqshalardy attestatsııalaý boıynsha máseleler bar. Onyń sheshimi retinde keıbir jekemenshik balabaqshalardy memlekettik balabaqshanyń kýratorlyǵyna berip jatyrmyz. Bul jerde pedagogter metodıkalyq jaǵynan kómek kórsetedi», - deıdi ol.
Buǵan deıin elordada 23 746 bala balabaqsha kezeginde turǵany jáne kún saıyn balabaqsha kezegine 90-100 ótinish beriletinin habarlaǵan edik.