Elordada ınvestıtsııalyq baǵdarlamalar qalaı júzege asyp jatyr
«Astana sý arnasy» mekemesiniń 2021-2025 jyldarǵa arnalǵan ınvestıtsııalyq baǵdarlamasy ótken jyly bekitildi. Investıtsııalyq baǵdarlama tarıf birge bekitiledi jáne oryndaýǵa sýbekt mindetti. Jáne jyl saıyn 1 mamyrǵa deıin atalǵan sýbekt ótken jyldyń esebin beredi. Búgin mine ınvestıtsııalyq baǵdarlama aıasynda «Astana sý arnasy» mekemesinde qandaı jumystar atqarylyp jatqanyn qadaǵalaýǵa keldik. Bıyl bul mekemege ınvestıtsııalyq baǵdarlama aıasynda 900 mln teńgege jýyq qarjy bólindi», - dedi Nur-Sultan qalasy Tabıǵı monopolııalardy retteý departamentiniń basshysy Bolat Tanabergenov BAQ ókilderine arnalǵan baspasóz týry barysynda.
Shara barysynda departament mamandary, qalalyq máslıhat depýtaty jáne BAQ ókilderi «Astana sý arnasyna» baǵynyshty birneshe nysannyń jumys barysymen tanysty.
Atap aıtqanda, Muńaıtpasov jáne Petrov kóshesi aralyǵynda sý qubyryn tartý barysymen, ındýstrıaldy parktegi sý sorǵysy stantsııasyna jáne qaladaǵy gıpohlorıt óndirý tsehyna bardy.
«Bizde elordanyń kommýnıkatsııa salasyna jaýapty, qyzmet kórsetetin birneshe mekeme bar. Olar - «Astana REK» jaryqqa jaýapty, «AstanaTeploTranzıt» jylýmen aınalysady jáne sáıkesinshe «Astana sý arnasy» - sý úshin jaýapty mekeme. Investıtsııalyq baǵdarlamany oryndaýda atalǵan kompanııalarǵa ortaq bir problema problema bar. Ol - baıqaýda kóbinese josyqsyz kompanııalardyń jeńip shyǵatyny. Sonyń saldarynan qyzmet kórsetýshi kompanııalardyń jumysynan aqaý shyǵyp, jumys aqsap jatady. Sol sııaqty keıbir josyqsyz mekemeler jobany ýaqytyly aıaqtamaıdy nemese sapasyz atqarady. Árıne bul zańbuzýshylyq. Investıtsııalyq baǵdarlamanyń oryndalmaýy anyqtalǵan jaǵdaıda biz óz tarapymyzdan zań aıasynda shara qabyldaımyz- deıdi ol.
«Astana sý arnasy» mekemesiniń málimetinshe, ótken jyly atalǵan baǵdarlama aıasynda jeke ınvestıtsııa kólemi 1 471 mln teńgeni qurasa, bıyl 8 aıdyń qorytyndysy boıynsha 449 mln teńge ınvestıtsııa esebinen ıgerilgen.