Elordada ınternet alaıaqtyqpen kúresetin kıberpýl quryldy

ASTANA. QazAqparat – Elordada polıtsııa departamenti janynan ınternet alaıaqtyqtyń aldyn alyp, faktilerdi anyqtaıtyn mamandar pýly iske qosyldy. Ol týraly atalǵan vedomstvonyń baspasóz máslıhaty barysynda aıtyldy, dep habarlaıdy QazAqparat tilshisi.

«Ótken jyldyń sońynda qalalyq polıtsııa departamenti janynan kıberpýl quryldy. Maqsat – kıberqylmys jáne ınternet alaıaqtyqpen kúres. Ondaǵy mamandar atalǵan baǵyttaǵy áreketterdiń aldyn alý jáne anyqtaýmen aınalysady. Ár aýdandyq polıtsııa basqarmasynda 10 qyzmetker bar, al jalpy qala boıynsha 40 maman jumys isteıdi. Barlyq maman arnaıy daıarlyqtan ótken, jumys isteý algorıtmin biledi», – dedi Astana qalalyq polıtsııa departamenti krımınaldy polıtsııa basqarma basshysynyń orynbasary Qaırat Mádıev.

Spıkerdiń dereginshe, ótken jyly elorda aýmaǵynda bolǵan ınternet alaıaqtyq qylmystardyń 33% ashyldy.

«Internet alaıaqtyq jazasyna kelsek, kináli qylmystyń deńgeıine qaraı 1 jyldan 5 jylǵa deıin arqalaıdy. Sonymen qatar atalǵan baǵytta Interpolmen de birlesip jumys isteımiz», -deıdi vedomstvo ókili.

Buǵan deıin Astanada bir aıdyń ishinde 443 ınternet alaıaqtyq faktisi tirkelgeni aıtyldy.