Elordada ınternet alaıaqtyq boıynsha qylmystyq isterdiń jartysynan astamy ashylmaǵan
Bul týraly Nur-Sultan qalasynyń polıtsııa departamenti Tergeý basqarmasynyń aǵa tergeýshisi Rıshad Áıtkenov málim etti, dep habarlaıdy QazAqparat tilshisi.
«Zardap shekkenderdiń basym kópshiligi olx.kz jáne kolesa.kz saıttarynyń qoldanýshylary. Alaıaqtyqpen aınalysatyndar satyp alýshyǵa osy saıttarǵa usqaıtyn platforma jasap, sonyń siltemesin jiberedi. Keıin ol saıtqa kirgende azamattan jeke derekteri men bank kartasynyń nómiri suralady. Bul málimetterdi bergennen soń satyp alýshynyń bank kartasynan aqshany aýdaryp alady. Jyl basynan beri osyndaı alaıaqtardyń qolynan 200-den astam elorda turǵyny zardap shekti. Al, tirkelgen qylmystyq isterdiń jartysynan astamy ashylmaǵan kúıi qalyp otyr», - dedi Rıshad Áıtkenov.
Onyń aıtýynsha, sońǵy ýaqytta ózin bank qyzmetkeri retinde tanystyryp, aldaý arqyly bank kartasynyń nómirin surap, adamdardyń esepshotynan aqsha urlaıtyndar kóbeıgen. Jyl basynan beri 270-ten astam elordalyq osyndaı alaıaqtarǵa aldanyp qalǵan.