Elordada ınklıýzıvti spartakıada ótti

NUR-SULTAN. QazAqparat - Elordanyń №22 mektep-gımnazııasynda aýtızmi bar júzden astam bala ınklıýzıvti spartakıadaǵa qatysty, dep habarlaıdy QazAqparat tilshisi.

Búgin 2 sáýir - Búkilálemdik aýtızm máselesi týraly aqparat taratý kúni. Bul kún 2008 jyly Katar memleketiniń bastamasymen bekitilgen. Maqsaty - jazylmaıtyn aýrýǵa shaldyqqan adamdardyń qajettiligine nazar aýdarý, olardyń ómir sapasyn jaqsartý.

Spartakıadany aýtızmi bar balalar ata-analarynyń «Orda» qoǵamdyq birlestigi uıymdastyrǵan. Oǵan júzge jýyq bala qatysty. Balalardy qoldaýǵa ata-analary, baýyrlary men ápkeleri keldi.

«Basty maqsatymyz - óz balalarymyzǵa kómektesý. Olarǵa sporttyq ortalyqtar, kınoteatrlar men mýzeılerdiń qoljetimdi bolǵanyn qalaımyz. Sondyqtan, 2016 jyly aýtızmi bar balalardyń ata-analary birigip, «Orda» qoǵamdyq birlestigin qurdy. 2017 jyly qala ákimdiginiń qoldaýymen aýtızmi bar balalardy ońaltý men áleýmettendirý jónindegi jobamyz qarjylandyryldy. 2018 jyly jobamyz keńeıip, aýtızmi bar balalarǵa óz úıinde arnaıy áleýmettik kómekti kórsetý boıynsha memlekettik tapsyrystardy ornalastyra bastadyq. Ázirge eki jobamyzǵa 220-dan astam bala qamtylǵan», - dedi «Orda» qoǵamdyq birlestiginiń tóraǵasy Saltanat Esmaǵanbetova.

Dúnıejúzilik densaýlyq saqtaý uıymynyń derekterine sáıkes, aýtızmge shaldyǵý jyl saıyn 13% kóbeıip otyr.

«Balalarǵa arnalǵan ınklıýzıvti spartakıada «Kóńildi start» túrinde ótip jatyr. Barlyq balalar sporttyq bilimmen qamtylmaǵan, sondyqtan árbir balaǵa jeńil ári túsinikti bolý úshin kóńildi starttar ótkizýdi uıǵardyq. Erekshe balalarǵa arnalǵan spartakıada bıyl birinshi ret ótkizilip jatyr. Sondyqtan ony jyl saıyn ótkizý josparlanýda. Biz aýtızmmen aýyratyn balalar máselesimen aınalysatyn uıym retinde álem nazaryn balalarǵa aýdarǵymyz keledi. Bizdiń balalardy qoǵamnyń qabyldaǵanyn qalaımyz», - dep atap ótti ol.

Oıyndardan keıin balalarǵa merekelik kontsert uıymdastyrylyp, syılyqtar taratyldy jáne olar fotosýretke túsirildi.

Erekshe balanyń anasy Merýert Kóshenovanyń aıtýynsha, aýtızmi bar balalardy áleýmettendirýge arnalǵan mundaı sharalar jıi ótkizilip turýy tıis.

«Biz úshin balalardyń qoǵammen etene aralasýy óte mańyzdy. Spartakıadalar búgin ǵana emes, aı saıyn ótip tursa degen tilegimiz bar», - dedi M. Kóshenova.