Elordada ıin tiresken qurylysqa shekteý qoıý baspana naryǵyna qalaı áser etedi

<p>Astanada núktelik qurylysqa tyıym salý turǵyn úı naryǵyna qalaı áser eteýi yqtımal? Buǵan qatysty Qazaqstan Birikken rıeltorlar qaýymdastyǵy prezıdentiniń keńesshisi Nına Lýkıanenko pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Meniń oıymsha, bul shekteý turǵyn úı naryǵyndaǵy jaǵdaıǵa eshqandaı áser etpeıdi. Jalpy, elimizde turǵyn úı qurylysy sektoryna jan-jaqty nazar aýdarý qajet. Elordada ondaǵan nysan qoldanystaǵy zańnamaǵa sáıkes salynyp jatqan joq. Bul jyljymaıtyn múlikti satyp alýshylar úshin ǵana emes, jalpy el úshin alańdatarlyq jaǵdaı», - dedi Nına Lýkıanenko Kazinform tilshisiniń saýalyna jaýap bere otyryp.

Ol sondaı-aq qazir turǵyn úı qunyna qandaı faktorlar áser etip otyrǵanyna toqtaldy.

«Ósimge túrli qoljetimdi qarjylandyrý baǵdarlamalary yqpal etedi. Atap aıtqanda, halyqtyń barlyq sanaty úshin tómen paıyzben nesıe berý. Men árqashan mundaı tetikterge qarsymyn», - dedi Nına Lýkıanenko.

Sarapshy mysal retinde kórshi Reseıdegi jaǵdaıdy eske saldy.

«Reseıdiń iri qalalardaǵy jyljymaıtyn múlik baǵasyn qarańyz. Onda jańa turǵyn úı qurylysyn qoldaý úshin mynadaı sharttar usynyldy: 10% bastapqy jarna jáne 2 paıyzben ıpoteka. Barlyǵy eki aıdan keıin baspana satyp alyp, ony qaıta ótkizetin ınvestorǵa aınaldy. Onyń ústine qazir bul eldiń ınvestıtsııalyq tartymdylyq deńgeıi asa joǵary emes. Sondyqtan bizdiń elimizde qurylys salýshylar arasynda úıdi saýdalaýǵa qatysty tártip ornatý kerek. Qazir kim qalaı satqysy keledi, solaı sata beredi. Ol úshin zańdy aınalyp ótetin sharttar oılap tapty, al halyq onymen kelisýge májbúr», - deıdi Nına Lýkıanenko.