Elordada ІІ Elızaveta patshaıymnyń atyndaǵy skver ashyldy

ASTANA. QazAqparat – Astanada Ulybrıtanııa patshaıymy ІІ Elızavetanyń qurmetine skver ashyldy. Saltanatty sharaǵa Ulybrıtanııanyń syrtqy ister mınıstri Djeıms Kleverlı qatysty, dep habarlaıdy QazAqparat tilshisi.

«ІІ Elızaveta patshaıymnyń qurmetine skverdi saltanatty ashý sharasyna qosh keldińizder! Patshaıym Ulybrıtanııa tarıhynda eń uzaq, 70 jyl boıy basqarǵan, asa mártebeli kórnekti kóshbasshy, dana bıleýshi jáne brıtan halqynyń birligi men tabandylyǵynyń sımvoly retinde este qaldy. Onyń abyroıy, qadir-qasıeti jáne keremet jetistikteri álemdegi mıllıondaǵan adamdardy shabyttandyrady. Qazaqstanda ІІ Elızaveta laıyqty súıispenshilik pen qurmetke ıe», - dedi QR Syrtqy ister mınıstriniń orynbasary Roman Vasılenko skverdiń ashylý saltanatynda.

Onyń aıtýynsha, elorda gúlzarlarynyń birine mártebeli patshaıymnyń esimin berý týraly sheshimdi Memleket basshysy Qasym-Jomart Toqaev tikeleı ózi qabyldady. Atalǵan syı ІІ Elızavetanyń mereıtoıyna oraı uıymdastyryldy.

«Ókinishke qaraı, ІІ Elızaveta patshaıym Qazaqstanda bolyp úlgermedi. Osy oraıda, III Charlz korol jáne korol otbasynyń basqa da músheleri bizdiń elge keledi dep úmittenemiz. Ulybrıtanııamen yntymaqtastyq Qazaqstannyń syrtqy saıasatynda basym oryn alatynyn atap ótkim keledi. Eki el arasyndaǵy dıplomatııalyq qatynastyń 30 jyldan astam ýaqyty ishinde saıası, saýda-ekonomıkalyq, ınvestıtsııalyq, mádenı-gýmanıtarlyq sala boıynsha strategııalyq áriptestik joǵary deńgeıge jetti», - dedi mınıstrdiń orynbasary.

Sondaı-aq, R. Vasılenko Ulybrıtanııanyń Syrtqy ister mınıstri Djeıms Kleverlıdiń elimizge sapary qazaq-brıtan qarym-qatynasynyń odan ári jan-jaqty damýyna qýatty serpin beretinine senim artty.

Eske salsaq, Ulybrıtanııa patshaıymy II Elızaveta Balmoral saraıynda 96 jasynda qaıtys boldy.

Memleket basshysy ІІ Elızaveta patshaıymnyń qaıtys bolýyna baılanysty kóńil aıtý jedelhatyn joldady.

Memleket basshysy Qasym-Jomart Toqaevtyń tapsyrmasymen Parlament Senatynyń tóraǵasy Máýlen Áshimbaev Ulybrıtanııa jáne Soltústik Irlandııa Qurama Koroldiginiń Patshaıymy ІІ Elızavetany memlekettik jerleý rásimine qatysty.

Byltyr elordanyń máslıhaty otyrysynda qaladaǵy skverlerdiń birine ІІ Elızaveta patshaıymnyń esimin berý usynylǵan edi.

Buǵan deıin habarlaǵanymyzdaı, Ulybrıtanııanyń Syrtqy ister mınıstri Djeıms Kleverlı Qazaqstanda resmı saparmen júr.