Elordada «Gúldene ber, Astana» ekologııalyq aktsııasy ótti
Aktsııa sheńberinde «Dostyq» úıi men EKSPO saıabaǵy alańyndaǵy «Beıbitshilik jáne kelisim» alleıasynda abattandyrý jáne aǵash otyrǵyzý jumystary uıymdastyryldy.
«Búgingi alǵash ótip otyrǵan ekologııalyq aktsııa elordamyzdyń kógaldandyrý jumysyna úles qosý maqsatynda uıymdastyrylyp otyr. Sonymen qatar, ashylǵanyna kóp bolmaǵan «Dostyq» úıiniń aýlasy men mańaıynda jasyldandyrý jumysyn júrgizýdemiz. Osylaısha tabıǵatymyzdy taza ustaýmen qosa, aǵash otyrǵyzyp, qalamyzdy jasyl jelekke bóleýdi jón sanadyq. Bul shara ózimiz úshin de, qala ekologııasy úshin de mańyzdy. Jəne búgingi aktsııaǵa jastar belsene qatysyp jatyr. Bul óz kezeginde olardyń tárbıesi men týǵan jerge degen janashyrlyǵynyń belgisi», - dedi Qazaqstan halqy assambleıasy tóraǵasynyń orynbasary Leonıd Prokopenko.
Atalǵan sharaǵa uıytqy bolǵan - Qazaqstan halqy assambleıasy men Astana qalasy əkimdigi. Aktsııaǵa Májilis depýtattary, qoǵamdyq kelisim qyzmetkerleri, etnomədenı birlestik ókilderi, respýblıkalyq jastar qozǵalysy belsendileri men stýdentter qatysty. Ekologııalyq aktsııa barysynda 350 túp qaraǵaı, shyrsha, qaıyń, terek otyrǵyzyldy. Sondaı-aq, EKSPO saıabaǵy alańynda aktsııa qatysýshylaryna ulttyq taǵamdar usynylyp, sońy jastardyń fleshmoby men etnomádenı ortalyqtardyń kontserttik baǵdarlamasyna ulasty.