Elordada ǵaryshkerlerdiń kásibı merekesi qarsańynda dástúrli «Ǵarysh jáne balalar» saıysy ótti (FOTO)

ASTANA. QazAqparat - Elimizdegi synaýshy ǵaryshker Aıdyn Aıymbetov kásibı merekesi qarsańynda elordadaǵy Oqýshylar saraıynda dástúrli «Ǵarysh jáne balalar» saıysyn ótkizdi.

Bul - ǵaryshkerdiń birneshe jyl qatarynan uıymdastyryp kele jatqan jas ǵaryshkerler mektebiniń shyǵarmashylyq saıysy, bunda ol ǵarysh úıirmesiniń jyl saıynǵy qorytyndysyn shyǵarady.

Bıylǵy jyly ǵarysh týraly bilimin tekseretin úsh kezeńnen turatyn saıysqa Astananyń 9 mektebi men balalar úıinen 33 oqýshy qatysty, sondaı-aq Qaraǵandy oqýshylary da baq synady.

Saıystyń eń qıyny teorııalyq kezeńi boldy, onda astronomııa men álemdik jáne qazaqstandyq ǵarysh boıynsha 40 suraq qoıyldy.

«Bul saıystyń maqsaty oqýshylardy patrıottyqqa tárbıeleý, sondaı-aq avıatsııa, ǵarysh salasyna qyzyǵýshylyqtaryn oıatý», - deıdi Oqýshylar saraıyna qarasty Jas ǵaryshkerler mektebiniń jetekshisi Aıdyn Aıymbetov.

Úsh jyl ishinde ǵylymı-ǵarysh úıirmesine 300-den astam bala kelgen. Aptasyna úsh ret Aıdyn Aqanuly ótkizetin sabaqqa 50-den astam bala qatysady.

10 jastaǵy Azat Bektemisov saıystyń jeńimpazy atandy, ol 40 suraqtyń 38-ine durys jaýap bergen.

«Maǵan úıirmedegi sabaqtar óte unaıdy, men bul jerde ǵarysh týraly kóp nárseni bildim. Men de óskende ǵaryshker bolýdy armandaımyn», - deıdi Azat.

Al baıqaýdyń ǵarysh týraly sýret salý kezeńinde balalar túrli sýretter saldy. Bul saıystyń jeńimpazy bolyp Astanadaǵy balalar úıiniń tárbıelenýshisi Roman Bobkov tanyldy. «Ǵarysh jáne balalar» saıysyna «Qazaqstan Ǵarysh Sapary» UK» AQ men Oqýshylar saraıy demeýshilik kórsetti.

«Qazaqstan Ǵarysh Sapary» UK» AQ prezıdentiniń keńesshisi Sara Nurǵalıeva jeńimpazdarǵa syılyq tabystap, balalar men olardyń jetekshisi Aıdyn Aıymbetovti kásibı merekeleri - Ǵaryshkerler kúnimen quttyqtady.