Elordada ǵalymdar Alash arystaryna qatysty tyń derekter usyndy

NUR-SULTAN. QazAqparat – Elordada «Ahmet Baıtursynuly oqýlary» aıasynda «Ǵasyrlar toǵysyndaǵy rýhanııat máseleleri» atty halyqaralyq ǵylymı-teorııalyq konferentsııa ótti, dep habarlaıdy QazAqparat.

Konferentsııanyń betashar sózinde L.N.Gýmılev atyndaǵy Eýrazııa ulttyq ýnıversıtetiniń prorektory Dıhan Qamzabekuly alashtanýdyń qazirgi maqsat, mindetterine toqtalyp, aldaǵy damý baǵyttary qandaı bolmaq degen máseleniń tóńireginde oı órbiti.

«Bilim berý júıesine, mektep oqýshylary men stýdentterge qoıylatyn talaptar, sonymen qatar qazirgi jahandaný jaǵdaıynda Qazaqstan halqy baıyrǵy qundylyqtaryn saqtaı otyryp, jańa sapaǵa kóterilýi tıis. «Rýhanı jańǵyrýdyń» dúnıege kelý sebepteri de osy talaptardan týyndap otyr. Alash rýhyna arnalǵan osy konferentsııada keshegini búginge úlgi etetin el bolashaǵy úshin mańyzdy ıdeıalar usynylady dep oılaımyn», - dedi D. Qamzabekuly.

Alash rýhyn ardaqtaýǵa arnalǵan konferentsııa aıasynda kóterilgen máseleler men usynystar negizinen keshegi men búgingini jalǵastyrýǵa jáne rýhanı jańǵyrýdyń joldaryn aıqyndaýǵa arnaldy.

Konferentsııaǵa elimizdiń túpkir-túpkirinen kelgen alashtanýshy ǵalymdar qatysty. Olar Alash arystarynyń ómiri men olarǵa qatysty tyń derekter jáne arhıv materıaldaryn usyndy.

Aıta ketsek, jıyndy L.N.Gýmılev atyndaǵy Eýrazııa ulttyq ýnıversıtetinde fılologııa fakýlteti men №48 mektep-lıtseıi birlesip uıymdastyrdy.