Elordada esirtkige táýeldi qansha adam bar

ASTANA QazAqparat –Astana qalasy polıtsııa departamenti esirtki bıznesine qarsy is-qımyl basqarmasynyń bólim bastyǵy Sergeı Ilınyh esirtkige táýeldi astanalyqtardyń resmı statıstıkasyn atady, dep habarlaıdy QazAqparat tilshisi.

«Qazirgi tańda resmı statıstıka boıynsha Psıhıkalyq densaýlyq ortalyǵynda 1195 adam esirtkige táýeldi retinde tirkeýde tur. Onyń ishinde 6 kámeletke tolmaǵan jetkinshek bar. Biraq bul resmı statıstıka. Beıresmı statıstıkany shyǵarý úshin osy sandy 5-ke kóbeıtý kerek degen paıymdar bar», - dedi departamen ókili.

Sondaı-aq ol sıntetıkalyq esirtki saýdasy qalaı uıymdastyrylatynyn aıtty.

«Jalpy sıntetıkalyq esirtki saýdasy túgeldeı ınternet arqyly iske asady. Bir top onyń jarnamasyna jaýapty bolady. Olar sıntetıkalyq esirtkiniń qandaı túrin qaı oryndardan alýǵa bolatynyn, baǵasyn jabyq messendjerler arqyly jarnamalaıdy. Taǵy bir top esirtki ázirleýmen aınalysady. Endi bireýler daıyndalǵan esirtkini belgilengen oryndarǵa jasyrady. Sondaı-aq esirtki saýdasynan túsken zańsyz aqshany zańdy aınalymǵa shyǵarýǵa jaýapty býhgalterııa bólimi bolady. Bul 4 zerthanany da osyndaı uıymdasqan toptar ashqan. Olardyń ústinen Qylmystyq Kodekstiń 297-baby boıynsha qylmystyq is qozǵaldy. Qazir ol sotta qaralyp jatyr», - dedi Sergeı Ilınyh.

Foto: static.bntu.by