Elordada esirtki jarnamalaıtyn 400-ge jýyq graffıtı-sýret joıyldy
Polıtsııa departamentiniń aqparatyna sáıkes, keıingi kezde esirtkiniń dástúrli túrlerimen qatar, sıntetıkalyq esirtkiler men olardyń balamalary keńinen taralyp keledi. Atap aıtqanda, ótken jyldyń shilde aıynan osy ýaqytqa deıin sıntetıkalyq esirtki zattarmen baılanysty 73 qylmystyq is tirkelgen.
«2019 jyly qala aýmaǵynda 180 kelige jýyq esirtki tárkilendi. Onyń ishinde 3 keliden astam geroın jáne 2,5 kelige jýyq sıntetıkalyq esirtki bar. Bıyl polıtsııa qyzmetkerleri 19 kelige jýyq esirtki zattaryn tárkiledi. Onyń ishinde 18,5 kelisi – sıntetıkalyq esirtki. Sondaı-aq elordada esirtki quraldaryn, psıhotroptyq zattar men prekýrsorlardy zańsyz jarnamalaý faktileri anyqtaldy. Odan bólek, keıingi kezde ınternet arqyly sıntetıkalyq esirtkiniń taralý qaýpi aıtarlyqtaı ósip keledi. Úgitteýshiler esirtki saýdasyn zańdy tabys tabý joly dep tanystyryp jasóspirimderge jumys usynǵan», - dep habarlaıdy Nur-Sultan qalasy ákimdiginen.
Mysaly ótken jyly azamattardyń kómegimen elordalyq polıtseıler 120 ınternet-saıttan esirtki jarnamasyna qatysty 400-ge jýyq graffıtı-sýretti anyqtap, alyp tastaǵan. Sıntetıkalyq esirtki usynatyn ınternet-resýrstardy jarnamalaýmen aınalysatyn 10 adam jaýapkershilikke tartyldy.
Aıta ketsek, ınternet-tehnologııalardy paıdalaný arqyly jasalǵan esirtki qylmystary úshin azamat 3 jyldan 6 jylǵa deıingi merzimge bas bostandyǵynan aıyrylady. Esirtki jáne psıhotroptyq zattardy saqtaý nemese satý faktileri boıynsha Polıtsııa departamentiniń Esirtki qylmysyna qarsy is-qımyl basqarmasyna habarlasýǵa bolady.