Elordada erteń ashyq aspan astynda gala-kontsert ótedi

ASTANA. QazAqparat – 1 shilde kúni elordanyń 25 jyldyǵyna oraı ashyq aspan astynda «Aıalaǵan Astana» gala-kontserti ótedi, dep habarlaıdy QazAqparat qala ákimdiginiń resmı saıtyna silteme jasap.

«Aıalaǵan Astana» – daryndy balalardy sahna óneriniń barlyq qupııalary men shoý-bıznes negizderine úıretetin elimizdiń jas juldyzdarynyń naǵyz fabrıkasy. Joba tálimgerleri – rejıssýra, vokal, horeografııa, akterlik kásip, ımıdj jáne stıl sheberleri. Jobanyń arqasynda qatysýshylar shyǵarmashylyq ortada bolyp, keremet kásibı tájirıbeni úırený múmkindikterine ıe bolady. Búgingi kúni «Aıalaǵan Astana» jobasy naǵyz ulttyq brendke aınaldy», - delingen málimette.

Respýblıkalyq balalar baıqaýy 2 kezeńmen ótedi. Birinshi kezeń – óńirler boıynsha irikteý, ekinshi kezeń – fınal. Baıqaýda 8 – 12 jas aralyǵyndaǵy balalar estradalyq-vokal janrynda óner kórsetip, baq synaıdy.

Aıta keteıik, «Aıalaǵan Astananyń» alǵashqy kezeńi 2013 jyly uıymdastyryldy, sodan beri 9 kezeń ótti. Joba arqasynda kóptegen juldyzdar, olardyń ishinde Muhamedalı Júginisov, Danelııa Tóleshova, Bolat Batyrbaev, Jánel Sádýaqas syndy jas ónerpazdar tanyldy. Jeńimpazdar men laýreattar qazir bedeldi halyqaralyq festıvaldarda óner kórsetip júr.

1 shilde kúni (bastalýy – saǵat 20.00-de, Turan dańǵyly, 2/6/ amfıteatr) ótetin gala-kontsertke álemdik deńgeıde jetistikke jetken ótken jyldarǵy baıqaý fınalısteri qatysady.

Al bıylǵy jyly úzdik atanǵan qatysýshy balalardyń «Novaıa volna» halyqaralyq baıqaýynda Qazaqstan namysyn qorǵaıtyn bolady.