Elordada erekshe balalardyń qolóner týyndylary qoıylǵan kórme ashyldy
Búgin elordadaǵy Ulttyq mýzeıde Ulystyń uly kúni - Naýryz meıramyna arnalǵan «Kóktem sımfonııasy» atty ulttyq kórmeniń saltanatty ashylý rásimi ótti.
Kórmeniń maqsaty – jas urpaqqa qazaq halqynyń mádenıeti men salt-dástúrlerin tanystyrý, sol arqyly jas býynnyń shyǵarmashylyq qabiletterin damytý, qazaq halqynyń sándik qoldanbaly ónerine degen qyzyǵýshylyqtaryn oıatý.
«Búgin bizde erekshe kórme ótip jatyr. Sımfonııa degenimiz búkil dybystardyń birigýi. Osy turǵyda biz erekshe ári daryndy balalardyń kartına, qolóner, óleń jáne taqpaǵy arqyly barshaǵa kóktemniń shýaǵyn taratqymyz keledi. Biz árdaıym erekshe balalardyń beıneleý jáne qolóner buıymdaryn kópshilikke keńinen nasıhattaý arqyly olarǵa qoǵamdyq qoldaý kórsetýimiz kerek», - dedi QR Ulttyq mýzeıiniń kishi ǵylymı qyzmetkeri Zýhra Baıanova.
Kórmege Nur-Sultan qalasy ákimdigine qarasty №1 arnaıy mektep-ınternaty men «Sharapat» áleýmettik qyzmet kórsetý ortalyǵynyń arnaıy bilim berýdi qajet etetin balalarynyń, «Únsiz álem – Bezmolvnyı mır» estý qabileti tómen jandardy qoldaý qoǵamdyq qorynyń qoldan jasalǵan ulttyq kádesyılardy shyǵarý sheberhanasy jumysshylarynyń qolynan shyqqan ulttyq kádesyılar, monshaqtan tigilgen kartınalar, keskindemelik týyndylar qoıyldy.
«Kórmege qoıylǵan týyndylar erekshe mahabbat, izgi nıetpen jasalǵan. Jáne qolóner buıymdary men sýretter adamdy shyǵarmashylyqqa baýlıdy, sol sııaqty kóńil kóteriledi», - dedi QR Ulttyq mýzeıi ekskýrsııa bóliminiń jetekshisi Janar Saǵynbaıqyzy.