Elordada «Eń baı áke» kitabynyń tusaýkeseri ótti

NUR-SULTAN. QazAqparat - Nur-Sultanda belgili qalamger, QR Parlamenti Májilisi birinshi shaqyrylymynyń depýtaty, tuńǵysh qazaq tilinde jazylǵan «Halyqtyń kóshi-qony týraly» zańynyń avtory Ákim Ysqaqtyń 60 jyldyq mereıtoıyna arnalǵan «Eń baı áke» kitabynyń tusaýkeser rásimi ótti.

Jınaqty jazýshynyń bir top shákirtteri shyǵarǵan. Oǵan Á.Ysqaqtyń Qazaqstannyń túkpir-túkpirindegi oqyrmandarynan kelgen hattar, estelikter, jas aqyndardyń arnaý óleńderi engizilgen. Sondaı-aq, Ómirbek Baıgeldi, Marat Ospanov, Farıza Ońǵarsynova, Ákim Tarazı, Qalıhan Ysqaq, Muhtar Shahanov, Ulyqbek Esdaýlet, Kópen Ámirbek, Nesipbek Aıtuly, Marhabat Baıǵut syndy qazaq zııalylarynyń jazýshy týraly aıtqan oı-pikirleri de bar.

Kitaptyń tusaýyn QR Memlekettik qyzmet isteri agenttigi tóraǵasynyń orynbasary Darhan Jazyqbaev, QR Parlamentiniń birneshe shaqyrylym depýtaty, f.ǵ.d. Ýálıhan Qalıjan, satırık Kópen Ámirbek qıdy.

«Kitaptyń atynyń «Eń baı áke» dep qoıylýy óte utymdy. Bul Ákim Ysqaqtyń rýhanı baı ekenin kórsetedi. Bir shetinen osyndaı kitaptyń shyǵýy – Ákimniń jáne onyń shákirtteriniń tyndyrymdylyǵynyń nátıjesi. Jaqsy kitap», - dep baǵa berdi K.Ámirbek.

QR Memlekettik Eltańbasynyń avtory Jandarbek Málibekov Á.Ysqaqqa latyn qarpinde jasalǵan gerbtiń bir nusqasyn tartý etti. Sonymen birge jıynǵa QR Parlamenti Senaty apparaty basshysynyń orynbasary, aqyn Asqar Órtembaev, «Aqjol» partııasy tóraǵasynyń orynbasary Qazybek Isa, jýrnalıst Beken Qaırat jáne taǵy basqa qoǵam qaıratkerleri qatysyp, sóz sóıledi. Shákirtteri shyǵarmalarynan úzindi oqyp, ánderin oryndady.