Elordada eki kúnnen keıin ulttyq sport túrlerinen «Uly Dala rýhy» festıvali bastalady
Respýblıkalyq uly «Uly dala rýhy» festıvali ulttyq sport túrlerinen uzaq merzimge josparlanǵan aýqymdy joba. Festıvaldiń maqsaty - Prezıdent Nursultan Nazarbaevtyń «Rýhanı jańǵyrý» ıdeıasyn júzege asyrý, ulttyq sport túrleriniń qoǵamdyq sıpat alýyna, júıeli damýyna tyń serpin berý bolyp otyr
«QR Mádenıet jáne sport mınıstrligi Astananyń 20-jyldyǵyn merekeleý aıasynda birshama aýqymdy sporttyq sharalardy qolǵa aldy. «Uly Dala rýhynyń» ereksheligi - festıval elimizdiń barlyq óńirin qamtıdy. Áý basta Astana ortalyq bolyp, úsh aıdan soń aqtyq jarystar elordasynda uıymdastyrylady dep kózdelgen. Sol jospar boıynsha, festıval 4 shildede bastalady. Ulttyq sporttyń segiz túrinen úsh aıǵa sozylatyn doda 16 qyrkúıekke deıin jalǵasady», - dedi OKQ-da ótken baspasóz máslıhatynda QR MSM Sport jáne dene shynyqtyrý isteri komıtetiniń tóraǵasy Serik Jarasbaev.
Komıteti tóraǵasynyń aıtýynsha, jalpy úsh aıdyń ishinde ulttyq sport túrlerinen ótetin saıysqa 7 myńnan astam sportshy qatysady. Ulttyq sporttyń kókpar, báıge, teńge ilý, aýdaryspaq, jamby atý, qazaq kúresi, toǵyzqumalaq, asyq atý túrinen ótetin jarystar komandalyq tártipte júrgiziledi.
Úsh aıdan astam ýaqytqa sozylatyn bul festıval II kezeńge bólingen. I kezeń - aımaqtyq irikteý jarystary. Alǵashqy kezeń básekesi tórt aımaqta ótedi. 4 shilde kúni Qazmedıa ortalyǵynda festıvaldiń ashylý saltanaty jáne jerebe tartý rásimi bolady. Osy jerebe boıynsha ótetin respýblıkamyzdyń Ońtústik, Shyǵys, Batys jáne Soltústik aımaqtaryndaǵy jarystardyń saltanatty ashylýy ár merzimge belgilengen. Atap aıtqanda, 13-15 shilde kúnderi Shymkent qalasynda Ońtústik aımaq, 27-29 shilde kúnderi Aqtóbe qalasynda Batys aımaq, 13-15 tamyz kúnderi Pavlodar qalasynda Shyǵys aımaq, 17-19 tamyz kúnderi Astana qalasynda Soltústik aımaq jarystarynyń saltanatty ashylýy ótkiziledi. Sondaı-aq, kókpar, qazaq kúresi, toǵyzqumalaq, asyq atý sport túrleriniń irikteý básekelerin aımaqtyq óńirlerde, al, aýdaryspaq, jamby, teńge, báıge sport túrleriniń irikteý básekelerin Astanada ótkizý josparlanǵan.
Aımaqtardaǵy irikteý jarystary 31 tamyzda márege jetedi. Elimizdegi 14 oblys, 3 qala komandalary arasynan úzdik shyqqan komandalar festıvaldiń II kezeńine ótedi. Astana qalasynda 11-16 qyrkúıek kúnderi aralyǵynda ótetin ІІ kezeńge 250 jýyq sportshy qatysady dep kútilýde. Festıvaldiń II kezeńińde jartylaı fınal men fınaldyq básekeler tamashalanady.
Foto: fb.onthe.io