Elordada dúnıejúzilik saýda ortalyǵynyń negizi qalandy
«Búgin - elorda tarıhyndaǵy mańyzdy kúnderdiń biri. Bas qalamyzda Dúnıejúzilik saýda ortalyǵy negiziniń qalanýy - qalanyń strategııalyq damýynyń bir bóligi. Endigi ýaqytta EKSPO aýmaǵynda jáne «Astana» halyqaralyq qarjy ortalyǵy janynan taǵy bir álemdik deńgeıdegi ınvestıtsııalyq brend ashylǵaly otyr. Bul óz kezeginde Nur-Sultan qalasynyń halyqaralyq ınvestıtsııalyq mańyzdy ortalyqtardyń biri ekendigin bildiredi», - dedi B.Sultanov.
Óz kezeginde «Nest Investments Holdings» kompanııasynyń korporatıvtik ınvestıtsııa jónindegi dırektory Mehran Eftehar elordada álemdegi eń iri saýda qaýymdastyǵynyń negizi qalanǵanyn aıta kele, onda 90 eldiń ókili jumys isteıtinin tilge tıek etti.
«Dúnıejúzilik saýda ortalyqtarynyń maqsaty - saýda men ınvestıtsııanyń jańa múmkindikterin qurý. Biz Qazaqstan astanasynyń álemdik jobalardy júzege asyratyn iri qalalardyń qatarynda ekenine qýanyshtymyz. Óıtkeni, bul qosymsha jumys orny, jańa ınvestıtsııa tartý jáne zamanaýı tehnologııalardy adam ıgiligine qoldaný degen sóz. Jańa saýda ortalyǵy - qala ekonomıkasyna paıda túsiretin, ońtaıly joba bolatynyna senimdimiz», - dedi M.Eftehar.
Eske sala ketsek, ústimizdegi jyldyń qańtar aıynda Elbasy Nursultan Nazarbaev halyqaralyq saýda ortalyqtary qaýymdastyǵynyń basqarma múshesi (WTCA) Rolf Draakpen jáne «Nest Investments HOLDINGS» kompanııasynyń korporatıvtik ınvestıtsııalar jónindegi dırektory Mehran Efteharmen kezdesip, elordada dúnıejúzilik saýda ortalyǵyn salý jobasyn maquldaǵan bolatyn.
«Biz Brıýsselde sizderdiń usynystaryńyzdy talqylap, taǵy da kezdesý ótkizý jóninde ýaǵdalasqan edik. Halyqaralyq saýda ortalyqtary qaýymdastyǵynyń mundaı jobalardy júzege asyrý isindegi mol tájirıbesin eskerip, bizdiń yntymaqtastyǵymyz eki tarapqa da jemisti bolady dep oılaımyn. Bul joba elordamyzdyń kelbeti men rýhyna saı kelip, onyń ajaryn asha túskenin qalar edim, - dedi Elbasy.