Elordada dástúrli «Myń alǵys» qaıyrymdylyq keshi bastaldy
Qaıyrymdylyq keshi 2016 jyly Elbasy N. Á. Nazarbaev bekitken «1 naýryz – Alǵys aıtý kúnine» oraılastyrylyp otyr. Keshtiń maqsaty – meıirimdilik, qaıyrymdylyq, ómirge degen qulshynysty nasıhattaý, sondaı-aq kómekke muqtaj jandar men aýyr dertke shaldyqqandarǵa kómektesý. Іs-sharaǵa Parlamenttiń qos palatasynyń, onyń ishinde QHA atynan saılanǵan depýtattar men zııaly qaýym jáne BAQ ókilderi kelgen.
Qaıyrymdylyq keshinde «Myń alǵys» radıohabaryna kómek suraı kelgen jandarǵa qarjylaı qoldaý kórsetilip, em-domyna jınalǵan qarajat tabystaldy. Budan bólek, 3 kópbalaly otbasyǵa páter kilti berildi. Bir-birin joǵaltyp alǵan apaly-sińlili jandardyń 56 jyldan keıin sahnada kezdesýi de kórermen júregin tebirentti. Sheshentsan Respýblıkasynan kelgen Natalıa Shengırıeva Pavlodar qalasynda turatyn baýyryn «Qazaq» radıosyndaǵy «Barmysyń, baýyrym?» baǵdarlamasynyń arqasynda tapqan.
Aıta ketken jón, «Qazaqstan» RTRK men «Qazaq radıolary» JShS bul qaıyrymdylyq marafonyn osymen úshinshi jyl qatarynan ótkizip otyr. Osy ýaqyt ishinde «Myń alǵys» jobasy arqyly jalpy somasy 85 mln.teńgeden astam qarjyǵa kómek kórsetilgen.