Elordada bıýdjet ashyqtyǵyn kórsetpegen memlekettik organdar anyqtaldy

NUR-SULTAN. QazAqparat – Nur-Sultan qalasyndaǵy memlekettik organdardyń ashyq bıýdjet ınteraktıvti kartasy bar. Onda organdardyń bıýdjeti týraly ashyq málimet turýy tıis. Degenmen keıbir memlekettik organdar men basqarmalar atalǵan málimetterdi áli kúnge deıin kórsetpegen. Bul týraly Nur-Sultan qalasynyń sybaılas jemqorlyqqa qarsy kúres departamenti basshysynyń orynbasary Jazıra Jylqyshıeva málim etti, dep habarlaıdy QazAqparat tilshisi.

«2018 jyldan bastap elordada bıýdjet ashyqtyǵyn kórsetetin ınteraktıvti karta jobasy iske qosyldy. Biz buǵan deıin birneshe ret qala basshysymen birge osy jobanyń júzege asyrylýyn taldadyq. Interaktıvti kartanyń jumysyna qatysty naqty tapsyrmalarda berildi. Búgingi kúni bıýdjet ashyqtyǵyn kórsetetin atalǵan kartada 523 mlrd teńgeniń somasy kórinip tur. Bul barlyq bıýdjettiń 82%, osy oraıda bıýdjettiń tolyqtaı 100% kórinip turǵany abzal», - dedi Jazıra Jylqyshıeva elordadaǵy memlekettik organdardyń sybaılas jemqorlyqpen kúres saıasatyn júzege asyrý máselelerine arnalǵan jıyn barysynda.

Sondaı-aq, departament basshysynyń orynbasary, bıýdjet ashyqtyǵyna qatysty málimetterdi usynbaǵan elordalyq memlekettik organdarǵa toqtalyp ótti.

«Búginde bıýdjet týraly málimetterdi qalalyq kólik, din isteri, qarjy, turǵyn úı jáne turǵyn úı saıasaty, tsıfrlyq jáne memlekettik qyzmetter, otyn energetıkalyq kesheni jáne kommýnaldyq sharýashylyq basqarmalary men Baıqońyr aýdany ákimdik apparaty usynbaı otyr», - dedi ol.

Onyń aıtýynsha, memlekettik organdardyń basshylary jemqorlyqtyń aldyn alýǵa qatysty jumystardy tıisti deńgeıde júrgizbeı otyr.

«Qazirgi ýaqytta jemqorlyq táýekelderin joıýǵa qatysty taldaý jumystaryn tek 5 basqarma júrgizdi. Olardyń qatarynda qalalyq bilim, qorshaǵan ortany qorǵaý jáne tabıǵatty paıdalaný, qurylys basqarmalary jáne Esil, Saryarqa aýdandyq ákimdikteri bar. Qalǵan basqarmalarda ishki taldaý jumystary ótkizilmegen. Sonymen qatar, sybaılas jemqorlyq táýekelderine qatysty taldaý usynymdary formaldy sıpatqa ıe. Esesine ózderiniń negizgi qyzmeti týraly taldaý júrgizilmegen málimetterdi beredi», - dedi J. Jylqyshıeva.

Buǵan deıin QR Sybaılas jemqorlyqqa qarsy kúres agenttigi tórǵasynyń orynbasary Shyńǵys Qabdýlanyń elordalyq sheneýnikterdiń sybaılas jemqorlyq táýekelderine qatysty jumystaryn synǵa alǵany týraly habarlaǵan bolatynbyz.