Elordada bıylǵy alǵashqy úshem dúnıege keldi

ASTANA. QazAqparat - Bul – bıyl dúnıe esigin ashqan alǵashqy úshem sábıler. Jyl basynan beri Astanada 7 myńnan astam náreste ómirge keldi, dep habarlaıdy QazAqparat densaýlyq saqtaý basqarmasyna silteme jasap.

Úsh balaly ana birden kópbalaly úıelmender qataryna qosyldy.

Ásel Shontaeva otbasymen birge byltyr tamyz aıynda Jambyl oblysy Qordaı aýdanynan elordaǵa kóship kelgen.

Úshemderdiń ekeýi qyz, bireýi - ul. Qala turǵyny №3 kópbeıindi qalalyq aýrýhana dárigerlerine rızashylyǵyn jetkizdi.

Qýanysh ıesin arnaıy quttyqtaý úshin Astana qalasynyń qoǵamdyq densaýlyq saqtaý basqarmasynyń basshysy Tımýr Muratov bardy.

«Bala densaýlyǵy basty nazarda. Elordamyzda jyl saıyn halyq sany artyp kele jatqandyqtan taǵy eki perınataldy ortalyq salý josparda bar. Qazir úsh birdeı perzenthana jumys istep tur. Budan bólek kadrlardyń kásibı biliktiligin arttyrýǵa erekshe kóńil bólemiz. Byltyr 800-den astam maman jergilikti bıýdjet qarajatynan shetelde bilim alyp keldi. Olardyń arasynda neonatolog, pedıatr mamandary jeterlik», - dedi basqarma basshysy.

Jyl saıyn atalmysh aýrýhanada 8 myńnan astam áıel medıtsınalyq kómek alady.

Táýligine akýsherler 15-25 áıeldi bosandyrady.

Elordada jylyna 33 myńnan astam bala dúnıege kelse, onyń ishinde ekosyz úshemniń ómirge kelýi sırek jaǵdaı.

«Byltyr ana ólimi bolǵan joq, náreste shetinep ketken jaǵdaı eń tómen deıgeıde boldy. Patsıentterimizge kórsetiletin qyzmet sapasy únemi baqylaýda», - deıdi bas dáriger Juldyz Danbaeva.

Sánııa, Samıra jáne Aısultan esimdi balapandardyń densaýlyǵy jaqsy. Dárigerler sábılerge kútim kórsetip, úıge shyǵarýǵa daıyndap jatyr.