Elordada bitimgershilik tehnologııalary boıynsha BUU sımpozıýmy bastaldy
Alǵash ret Qazaqstanda «Boljam. Qorǵanys. Aldyn alý (Predict, Protect, Prevent)» taqyrybynda QR Qorǵanys mınıstrligi Birikken Ulttar Uıymynyń Hatshylyǵymen birlese uıymdastyrylǵan bitimgershilik tehnologııalardaǵy seriktestik boıynsha BUU-nyń besinshi sımpozıýmy bastaldy.
QR Qorǵanys mınıstriniń shaqyrtýy boıynsha sımpozıýmǵa BUU Bas hatshysynyń jedel daıyndyq jónindegi orynbasary Atýl Hare jáne bitimgershilik operatsııalar baǵytyndaǵy orynbasary Jan-Per Lakrýa qatysyp jatyr.
Ótkizilip jatqan is-shara BUU-nyń bitimgershilik qyzmetin odan ári jetildirý aıasynda ózekti máselelerdi qarastyrý úshin tıimdi alań bolyp sanalady. Bul turǵyda Qazaqstan Respýblıkasy beıbitshilik pen qaýipsizdikti qamtamasyz etý aıasynda anaǵurlym qaýipsiz jáne tıimdi qyzmetke yqpal etetin tehnologııalyq tetikter men tyń jańalyqtar boıynsha birqatar usynystar engizýge nıetti.
«Sımpozıým bitimgershilik qyzmettiń barlyq qatysýshylary arasynda tyǵyz yntymaqtastyqty uıymdastyrýǵa, buǵan zertteý jáne taldaý ortalyqtaryn tartýǵa múmkindik beredi. Bul ózge elderdiń tájirıbesin zerdeleýge, sondaı-aq BUU-ǵa múshe memleketter qandaı ınnovatsııalyq ıdeıalardy engizip jatqanyn bilýge múmkindik týǵyzady. Atalǵan sharanyń uıymdastyrylýy BUU-nyń Qaýipsizdik Keńesinde Qazaqstan Respýblıkasynyń turaqty emes músheliginiń qısyndy aıaqtalýy bolmaq, sondaı-aq bolashaq qazaqstandyq bitimgershilik bastamalardy ilgeriletýge yqpal etedi», - dep atalyp ótken QR Qorǵanys mınıstrligi málimetinde.
Esterińizge sala keteıik, bitimgershilik boıynsha BUU-nyń sımpozıýmdary 2014 jyly Italııada, 2015 jyly Aýstrııada, 2016 jyly Ońtústik Koreıada jáne 2018 jyly Germanııada ótti.