Elordada bir táýlikte karantın tártibin buzǵan taǵy 10 mekeme anyqtaldy

NUR-SULTAN. QazAqparat - Elordanyń mobıldi toptary karantın talaptaryn buzatyn kásipkerlik sýbektilerin anyqtaýdy jalǵastyrýda. Qalalyq mekemelerde kóbinese betperde, áleýmettik qashyqtyq jáne belgilengen jumys tártibi saqtalmaıdy, dep habarlaıdy QazAqparat qala ákimdigine silteme jasap..

Ótken táýlikte mobıldi toptar karantın rejımin buzǵan 10 kásipkerlik sýbektini anyqtady. Esil aýdanynda tórt dúkende betperde rejımi saqtalmaǵan, onyń ishinde «Red mart» shaǵyn marketi, «Aıala» azyq-túlik dúkeni, «Bari bar» shaǵyn marketi jáne «Vash market» sýpermarketi bar. Sonymen qatar, belgilenbegen ýaqytta «Panaehalı» bary men «Han Talapaı» banket zaly kelýshilerge qyzmet kórsetti.
Saryarqa aýdanynda ornalasqan «Dıona» dúkeniniń eki fılıaly da belgilengen rejımdi buza otyryp jumys istedi.

Sondaı-aq Almaty aýdanyndaǵy «Mıata» laýndj bary men Baıqońyr aýdanyndaǵy «Kıno taım» mekemesi karantın rejımin buzdy.

Tártip buzýshylarǵa qatysty jınalǵan materıaldar ákimshilik shara qabyldaý jáne olardy jaýapkershilikke tartý úshin sanıtarlyq-epıdemıologııalyq baqylaý basqarmasyna joldandy.

Aıta ketý kerek, elorda 10 naýryzdan bastap epıdemıologııalyq ahýaldy baǵalaý boıynsha «qyzyl aımaqqa» ótti. Karantın rejımin buzýǵa jol bermeý jónindegi mobıldi toptar kúsheıtilgen rejımde jumysyn jalǵastyryp keledi.

Kásipkerlik sýbektileri sanıtarlyq normalardy jáne karantın talaptaryn qatań saqtaýy, talapty qaıta buzýǵa jol bermeýi tıis. Sonymen qatar, qala turǵyndarynyń ózderi adam kóp jınalatyn oryndardan aýlaq bolýy, sol sııaqty sanıtarlyq dárigerdiń keńesin tolyq oryndap, ózin jáne ózgelerdi qaýipten saqtaýy tıis.