Elordada bir kúnde 23 adamǵa qoǵamdyq orynda túkirgeni úshin aıyppul salynǵan

NUR-SULTAN. QazAqparat – Keshe Nur-Sultan qalasynda 23 adamǵa qoǵamdyq orynda túkirgeni úshin aıyppul salynǵan. Bul týraly qalalyq polıtsııa departamenti jergilikti polıtsııa qyzmeti basqarmasynyń bastyǵy Arman Aıtmaǵametov aıtty, dep habarlaıdy QazAqparat tilshisi.

«Qazirgi tańda quqyq buzýdyń mundaı túri kóshedegi kameralar arqyly avtomatty rejımde de, polıtsııa qyzmetshileriniń qadaǵalaýy nátıjesinde de anyqtalady. Árıne, azamattardyń habarlaýy arqyly da belgili bolyp jatady. Eger mundaı áreketke kýá bolsańyz, tártip buzylǵan sátti foto nemese vıdeo túrinde tirkep, «102» mobıldik qosymshasy arqyly málimdeýge bolady», - dedi ol brıfıngide.

Aıtýynsha, qoǵamdyq tártip buzýdyń atalǵan túri kóbinese kóshedegi kameralar arqyly anyqtalady.

«Keshegi bir kúnniń ózinde Nur-Sultan qalasy boıynsha polıtsııa qyzmetkerleri dál osy túkirý áreketine jatatyn 23 ákimshilik zań buzý faktisin anyqtady. Olardyń bári ákimshilik jaýapqa tartyldy. Anyqtalǵan 23 jaıttyń 17-si kóshedegi kameraǵa túsip qalsa, altaýyn polıtsııa qyzmetkerleri tirkegen», - dedi Arman Aıtmaǵametov.