Elordada bir keshte eki toı ótkizilgeni anyqtaldy
Elordanyń monıtorıng toptary táýlik boıy kúsheıtilgen rejımde jumys isteıdi. Qalanyń keıbir kásipkerlik nysandary eskertýge, jaýapkershilikke tartylǵanyna qaramastan karantın shekteýin júıeli túrde buzyp, esigin jaýyp alyp jumys isteýin toqtatar emes.
Keshe, 7 tamyzda elordanyń monıtorıng toptary qalanyń 20 mekemesinde karantın talaptary buzylǵanyn anyqtady.
Sonymen Esil aýdanyndaǵy 6 nysanda tıisti talaptar saqtalǵan joq. Qoǵamdyq tamaqtaný oryndarynyń senbi jáne jeksenbi kúnderi kelýshilerdi qabyldaǵan. Tyıym salǵanyna qaramastan, «Altyn shef restoran» meıramhanasynda kóp adamnyń qatysýymen toı ótti. Sondaı-aq, «Mıata» laýndj-bary, «Chechil Pub», «Tequilla» barlary, «Zoloto» meıramhanasy, «Alanya» klýby jumys rejımin saqtaǵan joq.
Karantın shekteýiniń saqtalmaýy Saryarqa aýdanynda ornalasqan «Búrkit», «Temirlan» kafelerinde, «Jin» laýndj barynda, «Respawn» kompıýter klýbynda, «Discovery coffee» kofehanasynda, «Arman Qala» meıramhanasynda, «Saýna na drovah», «Imperııa meha» dúkeninde tirkeldi.
Almaty aýdanyndaǵy karantındi buzýshylar tiziminde «Baq saraı» meıramhanasy, «Ohota» saýnasy, «Ryba moeı mechty» karaoke bary, «Alanııa» túngi klýby, «HZ» bary bar. Sonymen qatar, Jankent kóshesindegi jeke úılerdiń birinde toı ótkizilgeni anyqtaldy.
Tártip buzýshylarǵa qatysty jınalǵan materıaldar tıisti shara qoldaný úshin sanıtarlyq-epıdemıologııalyq baqylaý salasyndaǵy ýákiletti organǵa berildi.
Aıta ketý kerek, Nur-Sultan epıdemıologııalyq ahýaldy baǵalaý boıynsha bes aıdan beri «qyzyl» aımaqta tur.