Elordada Batys Qazaqstan oblysynyń jármeńkesi ótip jatyr

NUR-SULTAN. QazAqparat - Batys Qazaqstan oblysynyń fermerleri aımaqtyq aýyl sharýashylyǵy jármeńkesine naryq baǵasynan 10-20 paıyzǵa tómen baǵamen 120 tonna ónim shyǵardy. Dástúrli jármeńke «Han shatyr» SOO janyndaǵy alańda ótip jatyr, dep habarlaıdy QazAqparat qala ákimdigine silteme jasap.

Jármeńkede óńirdegi 80-nen astam óndirýshiniń taýarlary usynyldy, olar 65 tonna sıyr men jylqy eti, 36 myń dana taýyq jumyrtqasy, 20 tonna un men makaron ónimderi, 15 tonna shujyq jáne konservi ónimderi, 5 tonna balyq, 5 tonna ósimdik maıy, 3 tonna sút ónimderi, 5 tonna túrli sýsyndar jáne 2 tonna kondıterlik ónimder ákeldi.

«Jármeńkege 80-ge jýyq agroqurylym qatysady, olar astanalyqtarǵa et, konserviler, maı, irimshik, sýsyndar, makaron jáne basqa da ónimderdi ólkemizdiń 12 aýdanynan ákeldi. Batys qazaqstan oblysy - tabıǵı, sapaly mal sharýashylyǵy ónimderimen tanymal iri agrarlyq óńir. Munda azyq-túlik assortımentiniń túr-túri usynylǵan, óıtkeni jergilikti aýylsharýashylyq ónimderi elorda turǵyndary men qonaqtary arasynda suranysqa ıe. Jármeńkedegi baǵalar ádettegideı naryqtyq baǵadan 10-20% - ǵa tómen, bul elorda turǵyndary men qonaqtaryna ónimdi qolaıly baǵamen satyp alýǵa múmkindik beredi», - dedi BQO Aýyl sharýashylyǵy basqarmasynyń basshysy Jasulan Halıýllın.

Jármeńkege kelýshiler tómen baǵa men usynylǵan ónimder sapasynyń jaqsy ekenin atap ótýde.

«Munda barlyq qajetti ónimder usynylǵan jáne baǵalary qolaıly. Elordada jyl saıyn osyndaı jármeńkeler ótkiziletinine óte qýanyshtymyz, bul jumys bolashaqta da jalǵasa bersin», - dedi qala turǵyny Askerǵazy Jumaǵulov.

Aıta ketý kerek, jármeńke kezinde karantın talaptary saqtalady: maska rejımi, áleýmettik qashyq jáne qol gıgıenasy.

Esterińizge sala keteıik, Nur-Sultanda aýyl sharýashylyǵy óńirlik jármeńkeleriniń maýsymy 31 qazanǵa deıin jalǵasady.