Elordada «Batyrlarǵa taǵzym» sherýine 25 myń adam qatysty

NUR-SULTAN. QazAqparat - Nur-Sultan qalasynda «Batyrlarǵa taǵzym» sherýi ótip, oǵan 25 myń adam qatysty, dep habarlaıdy QazAqparat qala ákimdiginiń resmı saıtyna silteme jasap.

Urys dalasynda qaza tapqan jáne Otanyna aman-esen oralǵan jaýyngerlerdiń urpaqtary týǵan-týystarynyń portretterin ustap, «Qazaq eli» monýmenti alańyna jınaldy.

Sherý monýment alańynda bastalyp, Táýelsizdik dańǵyly boıyndaǵy «Otan qorǵaýshylar» alańyna deıin jalǵasty.

Іs-sharaǵa elordalyqtar ǵana emes, kórshi óńirlerdiń turǵyndary da qatysty. Olardyń arasynda Qaraǵandy, Kókshetaý, Pavlodar, Petropavl, Qostanaı, Almaty qalalarynyń turǵyndary jáne sheteldik qonaqtar boldy. Sherýge qatysýshylar «Otan qorǵaýshylar» monýmentine gúl shoqtaryn esh kedergisiz qoıýy úshin qaýipsizdikti qamtamasyz etý maqsatynda 15 top quryldy.

Soǵys jyldary erlik kórsetken atasyn eske alý úshin Dana Zeınýlla sherýge otbasymen birge qatysty. «Meniń atam Jaqsylyq Shahanov Fın jáne Ekinshi dúnıejúzilik soǵysqa qatysty. Tiri oralyp, otbasyly boldy. Keıin meniń anam dúnıege keldi. Odan biz taradyq... Atamyzǵa jeńis syılaǵany úshin rahmet aıtamyz!», - dedi D. Zeınýlla.

Óz kezeginde Nur-Sultan qalasyndaǵy «Batyrlarǵa taǵzym» úılestirý keńesiniń basshysy Aıda Baımaqova jaýyngerlerdiń urpaqtaryna sherýge qatysqandary úshin alǵys aıtty.

«Otbasymen, kishkentaı balalarymen kelgen kóptegen adamdardy kórip, bizdiń azamattarymyzdyń birligi men yntymaǵyna kezekti márte kózimiz jetti. Ekinshi dúnıejúzilik soǵysqa qatysýshylardyń urpaqtarynyń atynan qala ákimdigine sherýdi uıymdastyrýǵa qoldaý kórsetkeni úshin erekshe alǵys bildirgimiz keledi», - dedi A. Baımaqova.