Elordada balalarǵa shuǵyl medıtsınalyq kómek qalaı kórsetiledi

NUR-SULTAN. QazAqparat –Nur-Sultan qalalyq máslıhatynyń sessııasynda elorda ákiminiń orynbasary Berik Jákenov balalarǵa shuǵyl jáne kezek kúttirmeıtin medıtsınalyq kómek kórsetýdegi problemalardy atady, dep habarlaıdy QazAqparat tilshisi.

«Balalarǵa shuǵyl jáne kezek kúttirmeıtin medıtsınalyq kómekti jedel járdem stansasy, 3 balalar aýrýhanasy jáne kópbeıindi arýhanalardaǵy akýsherlik bólimshelerde kórsetiledi. Búgingi tańda elordada 18 jasqa deıingi balalardyń sany – 424 myń. Onyń ishinde 1 jasqa deıingi 52 myń bala bar. «Qazaqstan Respýblıkasy Halyq densaýlyǵy jáne densaýlyq saqtaý júıesi týraly» kodekske sáıkes, medıtsınalyq kómek kórsetýdiń shuǵyl, kezek kúttirmeıtin jáne josparly túri kiredi. Sonymen qatar úsh statsıonarda balalar ómirine qaýip tóndiretin jaǵdaılar, jazataıym oqıǵalar, jiti aýrýlar kezinde, oqıǵa ornynda, jolda táýlik boıy shuǵyl medıtsınalyq kómek kórsetiledi», - dedi ákim orynbasary.

Osy rette ol balalarǵa shuǵyl jáne kezek kúttirmeıtin medıtsınalyq kómek kórsetýde oryn alyp otyrǵan problemalarǵa toqtaldy.

«№1 kópbeıindi qalalyq balalar aýrýhanasy 1991 jyly salynǵan. Ǵımaraty jáne ınjenerlik jelileri kúrdeli jóndeýdi talap etedi. Osyǵan oraı jobalaý smetasy boıynsha jóndeý somasy memlekettik saraptamaǵa sáıkes, 2 mlrd teńgeden asady. 4 aqpandaǵy máslıhattyń sheshimi negizinde konkýrstyń rásim jarııalaý úshin 2 mln teńge alǵanbyz. Konkýrs bastaldy. Sáýirdiń 7-inde sheshim qabyldaımyz. Bıylǵy jumys jospary boıynsha 1 mlrd teńgege jóndeý jumystaryn júrgizý kózdelip otyr», - dedi Berik Jákenov.

Onyń atap ótýinshe, dál arýhananyń zararsyzdandyrý bólimshesiniń ǵımaratyn jóndeýge qosymsha 105 mln teńge qajet. Sonymen qatar qaladaǵy barlyq balalar aýrýhanalarynyń aýlalaryn abattandyrý jáne kógaldandyrý kerek. Bul jumystar aýdan ákimdiktermen birge júrgiziledi. Munan bólek №3 balalar aýrýhanasynda travmatologııa bólimshesin ashý qajet.