Elordada balalar arbasyn urlaǵan 27 jastaǵy kelinshektiń áreketi kameraǵa túsip qaldy

NUR-SULTAN. QazAqparat – Elorda polıtsııasyna balalar arbasynyń urlaný faktisimen jergilikti turǵyn shaǵymdandy. Onyń aıtýynsha, quny 45 myń teńge turatyn arba kireberistegi baspaldaq astynda turǵan, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Saryarqa aýdandyq polıtsııa basqarmasy qyzmetkerleriniń jedel-izdeý sharalaryn ótkizý kezinde kúdikti áıel anyqtalyp, ustaldy.

Polıtsııa bólimshesine jetkizilgen 27 jastaǵy áıel óz kinásin moıyndady.

Ol úıdiń janynan ótip bara jatqanda kireberistiń ashyq turǵan esiginen baspaldaqtyń astyndaǵy balalar arbalary men velosıpedterdi kórgen. Áıel múmkindikti paıdalana otyryp, arbalardyń birin balasyna urlap áketken.

Polıtsııa qyzmetkerleri urlanǵan zatty tárkilep, ıesine qaıtardy.

Atalǵan faktimen sot aldyndaǵy tergeý jumysy júrip jatyr.

Ustalǵan áıeldiń buryn jasalǵan osyǵan uqsas qylmystarǵa qatysy bar-joǵy anyqtalýda.

Nur-Sultan qalasynyń polıtsııa departamenti turǵyndarǵa qyraǵy bolyp, baǵaly zattaryn qaraýsyz qaldyrmaýyn suraıdy.