Elordada balalar arasynda hokkeıden qaıyrymdylyq týrnıri ótedi

NUR-SULTAN. QazAqparat - Halyqaralyq áıelder kúni belgili qazaqstandyq hokkeıshi Bulbul Qartanbaeva balalar arasynda qaıyrymdylyq týrnırin ótkizedi, dep habarlaıdy QazAqparat qala ákimdigine silteme jasap.

Týrnırdiń maqsaty - Nur-Sultanda balalar men áıelder hokkeıin nasıhattaý. Oıynshylar men komandalar tegin qatysady. Jarystyń árbir qatysýshysyna estelik kádesyı tabystalady, al alǵashqy úsh orynǵa ıe bolǵan komandalar medalmen marapattalady.
Týrnır jeńimpazyna kýboktan bólek 150 000 teńge kóleminde aqshalaı syılyq tabystalady.
Týrnır Street Hockey 3h3, ıaǵnı kóshe hokkeıi formatynda ótedi. Al tirkelgen ár komandanyń quramynda 9-13 jas aralyǵyndaǵy bes oıynshyǵa deıin bolýy qajet. Kóshe jarysyna 6-8 komanda qatysady dep kútilip otyr.
Oıyn 8 naýryz kúni saǵat 11:00-de Nur-Sultan qalasy Qajymuqan kóshesindegi 9/2-úıde ótedi.
Aıta keteıik, shara Qazaqstan hokkeı federatsııasy men Street Hockey qoldaýymen ótedi.