Elordada balabaqsha kezeginde turǵan bala sany naqtylandy

ASTANA. QazAqparat – Astanadaǵy memlekettik balabaqshalarda 33 myń bala qamtylǵan. Bul týraly elordanyń kommýnıkatsııalar qyzmetindegi baspasóz máslıhatynda qalalyq Bilim basqarmasy basshysynyń orynbasary Serik Ádilbaev aıtty, dep habarlaıdy QazAqparat tilshisi.

«Elordada jalpy 64 465 balany qamtyp turǵan 457 mektepke deıingi bilim berý uıymy jumys istep tur. Onyń arasynda 100-i memlekettik balabaqsha, 354-i jekemenshik uıym. Jeke sektordaǵy mektepke deıingi bilim berý uıymdarynyń 346-sy memlekettik tapsyrys boıynsha qyzmetin jalǵastyryp otyr. Memlekettik balabaqshalarda 32 903 bala (51%) jáne jekemenshik uıymdarda 31 562 bala (49%) tárbıelenip jatyr», - dedi S. Ádilbaev.

Onyń aıtýynsha, qazirgi kezde «INDIGO: elektrondy balabaqsha» portalynda kezekte 52 588 bala tirkelgen. Atap aıtqanda:

- 0-den 1 jasqa deıin - 15 831 bala;

- 1 jastan 2 jasqa deıin - 18 658 bala;

- 2 jastan 3 jasqa deıin - 8 332 bala;

- 3 jastan 4 jasqa deıin - 5 107 bala;

- 4 jastan 5 jasqa deıin - 3 071 bala;

- 5 jastan 6 jasqa deıin - 1 589 bala kezekte tur.

«Usynylǵan derekterge súıene otyryp, 2 jastan 6 jasqa deıingi kezek sany 18 093-ke jetti. Osy maqsatta balalardy mektepke deıingi bilim jáne tárbıemen keńinen qamtý baǵytynda 2023 jyly qosymsha 9 700 oryn ashý josparlanǵan», - dedi basqarma ókili.