Elordada bala týý artty

ASTANA. QazAqparat – Elordada bala týý kórsetkishi edáýir ósti. Ákimdik málimetine qaraǵanda, keıingi 10 jylda bala týý 41 paıyzǵa artyp otyr, dep habarlaıdy QazAqparat tilshisi.

Memleket basshysy bıylǵy qańtar aıynda emhanalardaǵy kezek pen perzenthanalardaǵy oryn tapshylyǵyn synǵa alǵan bolatyn. Osy turǵyda ákimdikten kezekti azaıtý jumystary qalaı josparlanyp jatqanyn suradyq.

«Jalpy, Astanada qalasynda áıelderge júktilik, bosaný, bosanǵannan keıingi kezeńdegi kómek jáne jańa týǵan nárestelerge statsıonarlyq medıtsınalyq járdem 550 oryndy qamtyp turǵan negizgi úsh uıymda iske asyrylyp jatyr. Keıingi 10 jylda bala týý 41 paıyzǵa artty. 2012 jyly – 19500, al 2022 jyly 31714 bala ómirge keldi», - delingen qala ákimdiginiń «QazAqparat» agenttigine bergen jaýabynda.

Keıinde qoldanysqa berilgen 130 orynǵa eseptelgen perınataldy ortalyqtyń ózine 14 jyl boldy. Ondaǵy oryndar birtindep 235-ke deıin jetkizildi.

Sonymen qatar 1982 jyly iske qosylǵan qalalyq perınataldy ortalyq 185 orynǵa deıin keńeıtildi.

1966 jyly paıdalanýǵa berilgen úshinshi akýsherlik blok zamanaýı talaptarǵa saı kelmeı otyr. Osyǵan qaramastan, ondaǵy oryndar 130-ǵa deıin jetkizilgen.

«Qalada bala týatyn jastaǵy 391 806 áıel bar. Bul óz kezeginde qaladaǵy áıelderdiń jalpy sanynyń 53,3 paıyzyn qurap otyr», - dep atalyp ótken ákimdik málimetinde.

Aıta keteıik, jarty jylda Astanada 15 myńnan astam náreste ómirge keldi.