Elordada azyq-túlik baǵasyn kótergen kásipkerler jazalandy

NUR-SULTAN. QazAqparat –Nur-Sultan qalasy ákiminiń orynbasary Baqtııar Máken qaladaǵy kásipkerlik nysandaryndaǵy zańbuzýshylyqtar týraly aıtty, dep habarlaıdy QazAqparat tilshisi.

«Tótenshe jaǵdaı kezinde keıbir kásiporyndar tarapynan ereje buzý jaǵdaılaryn anyqtaýdamyz. Qalada kún saıyn qyzmetine ruqsat etilgen nysandardyń sanıtarlyq normalardy oryndaýyna qatysty polıtseıler volonterlermen jáne ákimdik ókilderimen birlesip, reıdter júrgizýde», - dedi B. Máken.

Onyń sózine qaraǵanda, tıisti merzimde sanıtarlyq normalardyń saqtalmaýyna oraı 15 nysannyń qyzmeti ýaqytsha toqtatyldy.

«Ákimdiktiń mobıldi toptary turaqty túrde áleýmettik mańyzdaǵy azyq-túlik baǵasynyń negizsiz ósýi men sanıtarlyq normalardy oryndamaý faktilerin anyqtaýǵa qatysty reıdter júrgizedi. Baǵany negizsiz ósirgen birqatar kásipker jazalandy. Sýpermarketterdiń basshylary ákimshilik jazaǵa tartyldy, aıyppul somasy 100 aılyq eseptik kórsetkishti quraıdy», - dedi B. Máken.

Budan buryn habarlanǵandaı, 20 sáýirden bastap ónerkásiptik ári ındýstrıaldyq kásiporyndardyń jumysy jandandy.

Atalǵan sektorda 20 myńnan astam adam jumysqa kiristi. Sonymen qatar, qurylys salasynda 40 myńǵa jýyq adam jumysyn jalǵastyrdy.