Elordada azyq-túlik baǵasy qymbattamaý úshin qandaı jumystar atqarylýda
«Ótken jyldan bastap QR Saýda jáne ıntegratsııa mınıstrligimen birlese otyryp áleýmettik mańyzy bar azyq-túliktiń baǵa turaqtylyǵyn saqtaý mehanızmin júzege asyrýdamyz. ıAǵnı saýda jelileri taýar alar kezde bizden qarjylaı kómek alady, esesine olar azyq-túliktiń baǵasyn kótermeıdi. Byltyr bul joba jalpy somasy 180 mln teńgeni qurasa, bir jylda óziniń tıimdiligin kórsetip, bıyl 2,5 mlrd teńgeni qurap otyr. Onyń ishinde halyq jıi tutynatyn 19 ataýly azyq-túlik bar. Qarjylandyrý jergilikti bıýdjet esebinen júrgiziledi jáne búginde bul tájirıbe elimizdiń basqa óńirlerinde de qoldanylýda», - dedi Nur-Sultan qalalyq Investıtsııalar jáne kásipkerlikti damytý basqarmasynyń basshysy Erlan Bekmyrzaev.
Onyń aıtýynsha, Nur-Sultanda azyq-túlik baǵasynyń turaqtylyǵyn saqtaý maqsatynda ótken jyly 4 saýda jelisimen kelisimshart jasalsa, bıyl olardyń sany 12-ge jetti.
«Búginde elordanyń barlyq derlik iri saýda jelileri bizdiń mehanızmmen jumys isteýde. Onyń ishinde halyq arasynda jıi suranysqa ıe Small, Magnum jáne Cash&Carry saýda jelileri bar. Buǵan deıin jyl saıyn kartop, pııaz jáne sábizdiń baǵalary ósip tursa, bıyl 2,5 mlrd teńge qarjy bólýdiń arqasynda baǵa turaqtaldy. Árıne ol qarjy qaıtarý esebimen beriledi. Odan bólek, biz aýyl sharýashylyǵy ónimderin óndiretin fırmalarmen tikeleı baılanys ornatýdamyz. Bul – halyq qajetti kókónisterdiń baǵasyn turaqty ustaý degen sóz. Osy oraıda aldaǵy qysta azyq-túlik baǵasy óspeıdi dep boljap otyrmyz. Jáne baǵa turaqtylyǵyn saqtaý baǵytyndaǵy sharalardy tıisti organdarmen birlesip odan ári jalǵastyratyn bolamyz», - dedi ol.
Óz kezeginde Magnum Cash&Carry saýda jelisiniń aımaqtyq dırektory Maksım Savchenko baǵa turaqtylyǵymen qatar, onyń sapasyn da eskerý kerektigin alǵa tartty.
«Baǵa men sapa sáıkes kelse, demek tutynýshylar arasynda suranys artady degen sóz. Elorda ákimdigi qolǵa alǵan azyq-túlik baǵasyn turaqty ustaý turý jobasy birneshe jyl júzege asyrylyp keledi. Áleýmettik kompanııa retinde biz de baǵa turaqtylyǵyn saqtaýǵa tyrysamyz. Qazirgi ýaqytta bizde 4 túrli ónim boıynsha birqalypty baǵa. Ol kartop, pııaz, sábiz jáne qyryqqabat. Biz aldymen taýardy qansha kólemde jáne qaı ýaqytta alý kerektigi jóninde taldaý jasaımyz. Sodan soń qarjy alyp, oǵan taýar satyp alyp, onyń baǵasyn ornatamyz. Sondaı-aq, qalalyq ákimdik jáne basqa jaýapty mekeme ókilderi bizdegi baǵa turaqtylyǵy boıynsha monıtorıng júrgizedi», - deıdi M. Savchenko.