Elordada Ázerbaıjan elshisiniń qabyldaýy ótti
«Ázerbaıjan táýelsizdik alǵan alǵashqy kúnnen bastap el Parlamenti men Úkimeti memlekettik shekarany bekitip, eldiń týy men ánuranyn jáne eltańbasy jasady. Sol sııaqty ana tilimiz memlekettik deńgeıde bekitildi. Eldiń aýmaqtyq tutastyǵy men qaýipsizdigi qamtamasyz etildi. Qysqa merzimde armııa qurylyp, ulttyq jáne demokratııalyq talaptarǵa saı memlekettik organdar paıda boldy. Odan keıin shet elderde elshilikter ashylyp, halyqaralyq qarym-qatynasty nyǵaıtýǵa erekshe nazar aýdaryldy. Ázerbaıjan respýblıkasy óziniń alǵashqy qurylǵan kúninen bastap demokratııa jáne halyqtyń teńdigi qaǵıdattaryna negizdep, eldiń barlyq azamattaryna birdeı quqyq berdi», - dedi Ázerbaıjannyń Qazaqstandaǵy elshisi Rashad Mamedov.
Sondaı-aq, elshi Qazaqstan men Ázerbaıjan memleketiniń arasyndaǵy saıası-ekonomıkalyq jáne mádenı-gýmanıtarlyq qarym-qatynastarǵa da toqtalyp ótti.
«Ázerbaıjan qazaq halqynyń ǵasyrlyq tereń tarıhy bar. Táýelsizdik jyldary Qazaqstan men Ázerbaıjan arasyndaǵy saıası-ekonomıkalyq qarym-qatynastar barynsha damyp, búginde ol strategııalyq sıpatqa ıe. Eki el arasynda mádenı, gýmanıtarlyq, ekonomıkalyq jáne saıası yntymaqtastyǵymyzdyń áleýeti óte joǵary jáne biz ony odan ári belsendi damytýǵa yntalymyz», - dedi elshi myrza.
Ázerbaıjan elshisi óz sózine dálel retinde eki el arasyndaǵy taýar aınalymynyń 2018 jyly ótken jylmen salystyrǵanda 1,6 esege artyp, 220,7 mln AQSh dollaryn quraǵanyn jetkizdi.
Óz kezeginde elimizdiń Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev Ázerbaıjan elshisiniń jyly qabyldaýyna rızashylyǵyn bildirip, eki el arasyndaǵy qarym-qatynas tatýlyq pen birlikke negizdelgenin aıtyp ótti.
«Aldymen Ázerbaıjan respýblıkasyn ár el úshin qymbat baılyq bolyp tabylatyn táýelsizdiktiń 101 jyldyǵymen quttyqtaımyn. Bir ǵasyrdan astam ýaqyt ishinde sizder álemdegi demokratııaly el retinde úlgi bola bildirińizder. Búginde eki el arasynda baýyrlastyq qarym-qatynastan bólek, barlyq salany qamtyǵan áriptestik jáne strategııalyq tereń baılanys ornaǵan. Árıne osyndaı irgesi berik qalanǵan qarym-qatynastyń qalyptasýyna Elbasy Nursultan Nazarbaev pen Ázerbaıjan respýblıkasynyń prezıdenti Ilham Álıev myrza júrgizgen saıasattyń orny bólek. Buǵan dálel retinde ótken jylǵy Kaspıı teńiziniń quqyqtyq mártebesi týraly konventsııaǵa qol qoıýy sátin aıtýǵa bolady», - dedi mınıstr A. Jumaǵalıev.
Aıtýly sharaǵa elimizdegi barlyq memleketterdiń elshileri men elshilik qyzmetkerleri, sol sııaqty túrli halyqaralyq uıymdardyń Qazaqstandaǵy ókilderi qatysty.